HMOOB NTUJ TSHIAB

TXOJ KEV HLUB FORUM

December 2016

SunMonTueWedThuFriSat
    123
45678910
11121314151617
18192021222324
25262728293031

Calendar Calendar

Top posters

Npauj Npaim (1385)
 
Ntsuj_Plig (604)
 
Lubpajzoo (455)
 
Tubzoonraug (408)
 
Dok_Champa (368)
 
maivntximhlub (349)
 
NkaujNyiag (101)
 
PajHmabPajNtoos (96)
 
Tojxeem (94)
 
Nkauj_Hli (88)
 

Latest topics

» NCO KUV LUB QUB ZOG
Fri Nov 18, 2016 11:01 pm by Ntsuj_Plig

» Paj Huab & Yim Laj Lub neej hluas
Mon Oct 24, 2016 7:53 pm by Ntsuj_Plig

» Soob NTxawg Thoj Cov Lus Tham
Fri Sep 09, 2016 12:01 am by Ntsuj_Plig

» Lub neej zoo tam li dej ntws
Sat May 21, 2016 1:23 pm by Ntsuj_Plig

» Roob Cuam Kau Lub Neej Ib Vuag Dua
Tue May 03, 2016 8:13 pm by Ntsuj_Plig

» Qee yam zoo thiab qee yam phem
Fri Apr 15, 2016 12:45 pm by Ntsuj_Plig

» Koj puas xav paub??
Thu Mar 31, 2016 10:39 pm by Ntsuj_Plig

» NYIAJ TXIAG PAUV TSIS TAU KEV HLUB
Wed Mar 02, 2016 9:09 pm by Ntsuj_Plig

» Ntsuj Plig Tsis Zoo Li Neeg Ntiaj Teb
Mon Feb 29, 2016 1:40 am by Ntsuj_Plig

Who is online?

In total there is 1 user online :: 0 Registered, 0 Hidden and 1 Guest

None


Most users ever online was 80 on Sat Jun 30, 2012 10:41 pm

Statistics

Our users have posted a total of 4110 messages in 214 subjects

We have 36 registered users

The newest registered user is cwj mem hmoob

Keywords

huam  ntuj  txog  tshiab  Hmoob  niam  

Gallery


Log in

I forgot my password


    Ncaim Cev Tsis Ncaim Siab

    Share

    Npauj Npaim
    Moderator

    Posts : 1385
    Join date : 2011-02-11
    Age : 41

    Ncaim Cev Tsis Ncaim Siab

    Post by Npauj Npaim on Sat Feb 12, 2011 12:58 am

    First topic message reminder :

    Ncaim Cev Tsis Ncaim Siab



    Ncaim Cev Siab Quaj Dhi,


    Lub cev lam ncaim koj mus...,
    Lub siab tseem niaj hnub hlub...,
    Lub cev lam tias ncaim koj mus li...,
    Lub siab mob kub lug zoo li yuav khis...,

    Lub cev lam ua ib siab tso koj tseg...,
    Lub siab mob lub plawv yuav nres...,
    Lub cev lam ua ib siab mus...,
    Lub siab mob cuag tu...,







    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Tue Mar 22, 2011 2:18 am

    Npauj Npaim Txoj Kev Hlub, continues...,


    Npauj Npaim thiaj txais Ntsuj Plig ob cev khaubncaws los ntxua tag ces Ntsuj Plig txawm hais ntxiv tias, “Npauj Npaim, kuv thov koj ib yam ntxiv thiab puas tau os?”
    Npauj Npaim tig los saib Ntsuj Plig ib muag thiab teb tias, “Wsm…, tshuav dabtsi koj xav tau thiab os, Ntsuj Plig?”
    Ntsuj Plig thiaj txav los ze rau ntawm Npauj Npaim thiab hais rau nws tias, “Koj puas kam ntxuav kuv nraubqaum thiab mas lod?”
    Ua rau Npauj Npaim txog ib zag siav thiab tsis paub yuav teb tau licas vim nws txajmuag dhau lawm. Nws nyuam qhuav hlob xwb tsis tau nyob ze rau ibtug txivneej twg li ces ua rau nws ntshai thiab ho txajmuag thiab. Ntsuj Plig thiaj hais ntxiv tias, “Npauj Npaim, koj tsis kam los tsis ua licas. Kuv thov koj zamtxim nawd.”
    “Wsm…,” Npauj Npaim teb ibtug txaj txajmuag lawm ces Ntsuj Plig thiaj hais ntxiv tias, “Txhob txajmuag mas lod. Los wb da dej tsuag tsuag tsam tsaus ntuj lawm os.”
    “Aws,” Npauj Npaim teb thiab nws nqes mus zaum hauv dej ces Ntsuj Plig mam nqes mus hauv dej thiab. Ntsuj Plig muab dej ntov mus ntub Npauj Npaim ces Npauj Npaim ceeb thiab qw ib suab. Ntsuj Plig hais rau Npauj Npaim tias, “Npauj Npaim, koj lub suab zoo heev es koj puas kam hais kwvtxhiaj rau kuv mloog os?”
    “Wsm…, cia lwm zaus tso nawd,” Npauj Npaim teb.
    “Yog li yuavtsum nco ntsoov nawd,” Ntsuj Plig hais thiab txav los ze zuj zus ces Npauj Npaim txawm khiav yuav nce rovqab mus saum ntug vim nws ntshai tsam Ntsuj Plig los tuav nws. Ntsuj Plig txawm hais ntxiv tias, “Npauj Npaim, txhob ntshai ma, kuv yeej tsis ua licas rau koj li os.”


    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Tue Mar 22, 2011 2:19 am

    Npauj Npaim Txoj Kev Hlub, continues...,


    Npauj Npaim mus zaum ntawm ib lub pobzeb ces Ntsuj Plig los ce dej ntxuav Npauj Npaim ko taw. Npauj Npaim hais rau Ntsuj Plig tias, “Wsm…, koj tsum kiag na.”
    “Kuv yuav tsis tsum txog thaum koj nqes los wb da dej uake. Koj twb hais tias koj kam nrog kuv da dej uake no ned, Npauj Npaim,” Ntsuj Plig hais ntsia ntsoov rau Npauj Npaim ces ua rau nws txajmuag ntxiv thiab. Ntsuj Plig pheej ce dej los ntxuav Npauj Npaim ko taw thiab thov tias, “Npauj Npaim, txhob ntshai ma, kuv twb hais tias kuv tsis ua licas rau koj li no ned.”
    “Wsm…, ces thov txav mus kuv mam nqes los.”
    Ntsuj Plig thiaj txav mus rau nram qhov tob zog ces nws ua txuj poob dej lawm. Nws txawm hu tias, “Ej…, pab kuv os. Npauj Npaim los pab kuv na.”
    Npauj Npaim thiaj nqes loo thiab cev tes mus rub kiag Ntsuj Plig los rau theem pem qhov chaw ntxua khaubncaws. Tos nco xwb Ntsuj Plig twb tuav tau Npauj Npaim ob sab tes thiab muab rub puag rau xub ntiag lawm. Nkawv sib puag ib pliag ces Npauj Npaim mam muab Ntsuj Plig ob sab tes tshem zuj zus mus. Ntsuj Plig thiaj hais rau Npauj Npaim tias, “Npauj Npaim, ua tsaug os.”
    “Wsm…, ua tsaug dabtsi no?”
    “Ua tsaug uas koj tseem txhawj txog kuv thiab na.”
    “Koj…, koj lam sim kuv siab xwb puas yog?” Npauj Npaim hais.
    “Kuv tsis yog lam sim koj siab na. Kuv tsuas xav paub tias koj puas nyiam thiab xwb no na.”
    “Wsm…,” Npauj Npaim tsis paub yuav teb licas. Nws txawm mus muab nws daim tiab tsis ntub los hloov hnav. Nws hais rau Ntsuj Plig tias, “Ntsuj Plig, thov koj txhob saib kuv hnav tiab tso nawd.”
    “Aws, uali,” Ntsuj Plig tig mus rau sab tod lawm. Npauj Npaim hnav tau nws daim tiab thiab hloov lub tsho tag ces nws hais rau Ntsuj Plig tias, “Tau lawm os, ua tsaug ntau nawd.”
    “Ua tsaug dabtsi ma?” Ntsuj Plig hais.
    “Ua tsaug qhov koj tsis saib kuv na,” Npauj Npaim hais.
    “Yog li ntawm kuv ned, koj puas kam muab kuv cev khaubncaws ped los kho rau kuv hnav nad?”
    “As…,” Npauj Npaim rua qhov ncauj thiab tsis paub yuav teb tau licas. Ntsuj Plig txawm hais ntxiv tias, “Tsis uacas, kuv lam dag koj xwb os.”
    “Oh, koj mas, rovqab dag kuv dua lawm thiab no lod?” Npauj Npaim hais tag ces nws txawm mus muab Ntsuj Plig cov khaubncaws los cev rau nws hais tias, “Kavtsij tawm los hnav khaubncaws los mas.”
    “Tsis tau,” Ntsuj Plig hais.
    “Tsis tau no lod?” Npauj Npaim hais.
    “Koj twb tsis pub kuv saib koj, yog li koj yuavtsum tig mus txhob saib kuv thiab mas kuv thiaj tawm los hod,” Ntsuj Plig hais tag ces Npauj Npaim thiaj teb tias, “Aws…, uali, kuv mam tsis saib koj thiab los mas.”


    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Tue Mar 22, 2011 2:20 am

    Npauj Npaim Txoj Kev Hlub, continues...,


    Tom qab nkawd hnav khaubncaws tag ces nkawd los mus tsev lawm. Thaum nkawd los txog ntawm ntug zos, Ntsuj Plig nug Npauj Npaim tias, “Npauj Npaim, kuv xa koj los txog ntawm no xwb kuv yuav tau mus lawm nawd.”
    “Aws, uali os. Mus zoo koj nawd,” Npauj Npaim hais ntsia ntsoov rau Ntsuj Plig. Ntsuj Plig thiaj hais ntxiv tias, “Npauj Npaim.”
    “Abtsi os, Ntsuj Plig,” Npauj Npaim teb.
    “Puas kam ib chim kuv tuaj ntsib koj ua ntej koj mus pw os?”
    “Wsm…, tsis tau os, Ntsuj Plig,” Npauj Npaim hais.
    “Vim licas ma?”
    “Vim tias hmo no kuv muaj ntau yam haujlwm yuav tau leg kom tiag ua ntej mus pw,” Npauj Npaim hais.
    “Yog li tagkis koj yuav mus ua dabtsi ma? Puas kam kuv tuaj nrog koj mus thiab no?”
    “Wsm…, tau kawg. Tagkis ces kuv tus vivncaus yuav tuaj pauv kuv zog hlais nplej xwb os,” Npauj Npaim teb.
    “Yog li puas kam kuv tuaj pauv koj zog mus hlais nplej thiab mas lod?”
    “Wsm…, wb nyuam qhuav sib paub tsis ntev no xwb, uali koj puas tso siab tau nrog kuv mus hlais nplej tiag mas lod?”
    “Tau xwb, yog koj kam lawm nas. Uali koj tus vivncaus hu licas no?” Ntsuj Plig nug.
    “Nws hu ua Maiv Paj no os,” Npauj Npaim hais.
    “Oh, Maiv Paj no lod?” Ntsuj Plig nug.
    “Aws, yog mas. Koj twb paub nws lawm lod?” Npauj Npaim nug.
    “Kuv paub nws tus hluasnraug hu ua, “Tub” no mas.”
    “Yog li no thov koj mus hais Tub nrog peb mus thiab puas tau os? Vim tias kuv xav kom nkawd tau uake thiab na,” Npauj Npaim hais.
    “Aws, tau mas. Yog li mam sib ntsib tau tagkis nawd,” Ntsuj Plig hais.
    “Aws, tau mas, mam ntsib koj rau tagkis pem kev tshuam nawd,” Npauj Npaim hais tag ces nkawd nyias mus nyias tsev lawm.


    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Tue Mar 22, 2011 9:03 pm

    Hlais Nplej:

    Tagkis uas yog hnub lawv yuav mus hlais nplej lawm. Npauj Npaim sawv los npaj tshais ntxov ntxov thiab ntim mov kom txaus rau lawv sawvdaws tuaj noj uake. Nws muab tau ob peb daim nqaij nyuj qhuav los ci tsoo tau mos mos thiab npaj nqa mus noj lawm pem teb huvsi li. Thaum nws ntim tau mov tag, nws thiaj los hais rau nws niam tias, “Kuv niad, kuv twb npaj txhij lawm ces kuv mus pem teb lawm nawd.”
    “Aws, koj twb hais kom Maiv Paj tuaj ua koj luag lawm lod?” Npauj Npaim niam nug.
    “Aws, kuv twb teem kom nws tuaj pauv kuv zog ib hnub es lwm hnub kuv mam mus pauj nws no os, kuv niad,” Npauj Npaim hais qhia nws niam. Nws niam thiaj teb tias, “Uali mas, ib tsam no txhob los lig lig nawd. Hnub no koj txiv wb yuav mus ib hnub tsaus ntuj ntais mam los tsev, yog li koj yuavtsum los ntxov me ntsis los npauj hmo noj nawd.”
    “Aws, uali os, kuv niad, kuv mus lawm nawd,” Npauj Npaim hais tag ces nws tawm mus lawm. Nws mus nram Maiv Paj tsev ces nkawd mus dua tim lawv teb lawm. Thaum nkawd mus txog tom ntug zos ces Ntsuj Plig thiab Tub nkawd twb tuaj nyob tod tos lawm. Lawv thiaj uake mus dua tim teb lawm.

    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Tue Mar 22, 2011 9:05 pm

    "Hlais Nplej" continues...,


    Thaum lawv mus txog nram ntug teb, Ntsuj Plig ua npuab Npauj Npaim hos Tub ua npuab Maiv Paj. Npauj Npaim thiab Maiv Paj nkawd nyob hauv nruab nrab hos Ntsuj Plig thiab Tub nkawd tuaj ob sab. Lawv hlais nplej mas lomzem kawg vim tias lawv coob lawm ces ua rau lawv nquag heev li. Npauj Npaim pom tias Ntsuj Plig mas nquag heev li. Lawv hlais nplej ib pliag xwb Npauj Npaim saib zoo li Ntsuj Plig nqhis dej heev lawm, nws thiaj mus muab nws lub raj dej nqa los cev rau Ntsuj Plig thiab hais rau nws tias, “Ntsuj Plig, haus dej tso os.”
    Ntsuj Plig thiaj tig los saib Npauj Npaim ces nws cev tes los plhws Npauj Npaim lub plhu hais rau nws tias, “Uatsaug ntau nawd.”
    “Wsm…, tsis ua licas os,” Npauj Npaim teb thiab cev dej mus rau Ntsuj Plig haus. Ntsuj Plig thiaj txais dej mus haus tag ces nws ho muab ib qhov rau Npauj Npaim haus thiab. Thaum nkawd haus dej tag ces Npauj Npaim thiaj muab cev mus rau Maiv Paj thiab Tub nkawd haus. Thaum lawv haus dej tag ces Ntsuj Plig thiaj hais rau Npauj Npaim tias, “Npauj Npaim thiab Maiv Paj, yog neb tsis xav licas no cia Tub wb mam hlais nplej rau neb pav puas zoo thiab?”
    Npauj Npaim ntsia Maiv Paj thiab txiav muag rau nws tias, “Ua li nws hais nawd.”
    “Aws,” Maiv Paj teb tag ces Npauj Npaim thiaj teb rau Ntsuj Plig tias, “Aws, tau mas, uatsaug nawd.”
    Ces Ntsuj Plig thiab Tub nkawd mam hlais nplej cev los rau Npauj Npaim thiab Maiv Paj nkawd pav. Lawv hlais ib chim twb tsis tau hnov ntev cas lawv txawm siv hlais nto luag lawm. Ntsuj Plig thiab Tub nkawd los zaum ntawm qab ntoo tos Npauj Npaim thiab Maiv nkawd pav nplej tag ces Npauj Npaim thiaj hais rau Maiv Paj tias, “Maiv Paj.”
    “Abtsi os,” Maiv Paj teb.
    “Peb so ib pliag tso mam mus hlais dua os,” Npauj Npaim hais tag ces Maiv Paj thiaj mus zaum lawm. Tub thiaj sawv mus zaum nrog Maiv Paj ces Npauj Npaim thiaj los rau ntawm Ntsuj Plig. Ntsuj Plig thiaj cev tes mus tuav Npauj Npaim tes hais tias, “Npauj Npaim, puas kam nrog kuv zaum ntawm no mas lod?”
    “Wsm…, tau mas,” Npauj Npaim teb thiab hais ntxiv tias, “Ntsuj Plig, ua tsaug ntau uas hnub no muaj koj thiab Tub tuaj nrog Maiv Paj wb hlais nplej nawd.”
    “Aws, tsis ua licas. Tsuav koj zoo siab ces kuv yim huab zoo siab xwb os.”
    “Ntsuj Plig, kuv zoo siab tshaj li os. Vim muaj nej tuaj pab es peb twb hlais nplej tag ntau ntau lawm. Kuv xav tias yog kuv niam paub no ntshe nws yuav zoo siab heev li os,” Npauj Npaim hais luag ntxhi rau Ntsuj Plig. Ntsuj Plig thiaj teb tias, “Npauj Npaim, yog tias lwm hnub koj niam thiab koj txiv nkawd nrog koj tuaj no koj puas kam kuv tuaj dua lawm mas lod?”
    “Wsm…, cia lwm hnub tso mam nug kuv dua nawd,” Npauj Npaim teb.

    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Tue Mar 22, 2011 9:08 pm

    "Hlais Nplej" continues...,


    Lawv hlais nplej txog tavsu ces lawv thiaj los so noj sus. Npauj Npaim muab nws cov mov thiab cov nqaij los tso rau saum rooj noj mov. Maiv Paj ntim tau ib cov kua txob thiab ib cov zaub cub thiab. Ntsuj Plig thiaj hais rau Npauj Npaim tias, “Npauj Npaim, tshav kub kub li ces neb nyob es Tub wb mus nqa dej los peb mam noj mov nawd.”
    “Aws, uali os,” Npauj Npaim teb tag ces Ntsuj Plig thiab Tub nkawd mus nqa dej lawm. Maiv Paj thiab Npauj Npaim nkawd thiaj thau cov mov los tso rau ntawm rooj thiab Npauj Npaim mus de tau ob peb lub dib los ces nkawd muab kaus ua dej rau lawv haus ntxuag mov. Nkawd nyob tos Ntsuj Plig thiab Tub nkawd nqa dej los mam noj mov. Npauj Npaim hais rau Maiv Paj tias, “Maiv Paj, ua tsaug hnub no koj tuaj nrog kuv hlais nplej ib hnub li os.”
    “Tsis ua licas os, Npauj Npaim.”
    “Maiv Paj, hnub no muaj Ntsuj Plig thiab Tub nkawd tuaj pab wb thiab es peb hlais nplej tag ntau heev li. Yog tias lwm hnub koj npaj tau lawm no qhia kuv mam caw nkawd tuaj pab koj thiab nawd,” Npauj Npaim hais.
    “Aws, tsis ua licas. Tsuav koj muaj kev kajsiab xwb ces kuv zoo siab lawm,” Maiv Paj hais rau Npauj Npaim. Npauj Npaim thiab nug tias, “Maiv Paj, ua licas rau koj lawm nas cas zoo li koj tsis xav hais lus li?”
    “Npauj Npaim, tsis ua licas os. Twb yog tias kuv niam tsis pub kuv tham Tub lawm es kuv chim me ntsis xwb.”
    “Lod, es vim licas no?” Npauj Npaim nug.
    “Kuv niam hais tias Tub lawv yog neeg muaj ces kom txhob tham tsam lawv tsis nyiam yus no xwb os,” Maiv Paj hais.
    “Aud, li ntawd xwb ces tsis txhawj li os. Ua neeg nyob ces yeej zoo li ntawd. Tej ntu ces yus kuj ua neej muaj hos tej ntu ces yus kuj ua neej tsis muaj xwb. Zoo li lub qos uas muaj ib ntus nqia duav hos ib ntus tsis nqia xwb mas.” Npauj Npaim hais.
    “Npauj Npaim, koj hais yog lawm tabsis kuv niam hais tias lawv tsev Hmoob no nquag heev li tsam ces kuv mus tab tsis taus lawv no es koj xav ne, puas yog li thiab ma?”
    “Maiv Paj, kuv xav tias txawm lawv tsev Hmoob yuav zoo licas los xij tsis tseem ceeb. Qhov tseem ceeb es tsuav yog Tub nyiam thiab hlub koj xwb ces koj tsis txawj los nws mam li qhia koj xwb yeej tau lawm. Tsis tag li xwb koj twb yog kuv ibtug vivncaus zoo. Kuv twb tsis pom qhov koj yuav tsis txawj li ned,” Npauj Npaim hais tag ces Ntsuj Plig thiab Tub nkawd los txog lawm. Tub thiaj los hais rau Npauj Npaim tias, “Npauj Npaim, ua tsaug ntau uas koj muab lub sijhawm no los qhia rau Maiv Paj nawd. Kuv yeej xav lawm tias kuv yuav hlub nws ib leeg xwb no tabsis nws pheej tsis ntseeg kuv li. Yog li tabtom hnub no Ntsuj Plig tuaj caw kuv, kuv thiaj xav tias cia kuv mam tuaj nrog nws uake ib hnub ntxiv seb nws puas yuav hloov siab no.”
    “Tub, kuv los yeej tsis paub tias neb sibhlub tiag los dag. Kuv tsuas hais raws li qhov kuv xav xwb es yog koj yeej hlub Maiv Paj tiag no ces thov txhob ua siab phem rau nws nawd,” Npauj Npaim hais.
    “Npauj Npaim, koj tso siab tau. Kuv yeej yuav hlub thiab yuav yuav nws los ua kuv pojniam. Txawm kuv niam lawv yuav hais licas los kuv tsis mloog vim lawv tsis yog kuv lub neej. Maiv Paj thiaj yog kuv lub neej, kuv yuav tsis rhuav kuv cov lus uas kuv tau hais rau nws lawm tias yuav hlub nws mus kom tag tiam neej no. Thov koj pab hais rau nws thiab nawd,” Tub hais rau Npauj Npaim. Npauj Npaim thiaj teb tias, “Tub, kuv xav tias Maiv Paj twb hnov koj cov lus tag lawm ces cia nws mam txiav txim rau nws tus kheej thiab nws mam teb koj thaum uas koj thiab nws, neb nyob neb ob leeg uake xwb. Koj puas nkagsiab?”
    “Aws, kuv nkagsiab lawm,” Tub teb tag ces Ntsuj Plig thiaj hais rau lawv tias, “Nej tham tag lawm ces los peb noj mov tso mas lawv.”
    “Aws, los peb noj mov tso,” Npauj Npaim hais li tag ces lawv los noj mov uake lawm.


    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Tue Mar 22, 2011 9:10 pm

    "Hlais Nplej" continues...,


    Thaum lawv noj mov tag lawv rovqab mus hlais nplej. Ntsuj Plig cia lawv mus ua ntej tag nws mam lawv qab mus. Thaum nws majmam lawv qab mus saib lawv hlais nplej, ua rau Npauj Npaim xav tsis thoob li. Npauj Npaim thiaj hais rau Ntsuj Plig tias, “Ntsuj Plig, puas yog koj sab lawm os?”
    “Wsm…, kuv…,” Ntsuj Plig tsis paub yuav teb licas. Npauj Npaim thiaj hais ntxiv tias, “Yog koj sab lawm ces thov zaum ntawm koj cia peb ua xwb tau lawm mog,” Npauj Npaim hais thiab nqa dej los rau Ntsuj Plig haus. Nws cev dej rau Ntsuj Plig ces Ntsuj Plig thiaj cev tes los tuav Npauj Npaim sab tes hais rau nws tias, “Npauj Npaim, ua tsaug nawd.”
    “Aws, tsis ua licas.” Npauj Npaim teb.
    “Qhov tseeb tiag, kuv tsis tau nqhis dej. Tsuas yog tias kuv xav saib koj kom ntev ntev xwb,” Ntsuj Plig hais ntsia ntsoov rau Npauj Npaim. Npauj Npaim tsis paub yuav teb tau licas. Ntsuj Plig rovqab hais ntxiv tias, “Npauj Npaim.”
    “Abtsi os,” Npauj Npaim teb ntsia ntsoov rau Ntsuj Plig.
    “Kuv hlub koj lawm es koj puas kam hlub nrog kuv thiab os?” Ntsuj Plig nug.
    “Wsm…,” Npauj Npaim tsis paub yuav teb tau licas. Ntsuj Plig thiaj rovqab nug ntxiv tias, “Npauj Npaim, koj tsis tau kam teb kuv tam sim no los tsis ua cas tabsis cov lus tagkis no kuv nrog koj tham ntawd yeej muaj tseeb. Kuv thov qhia koj paub tias kuv tsis yog lam nrog koj sib tso dag uasi xwb, txhua lolus kuv tau nrog koj tham tagkis no los txog tau tam sim no ces kuv yeej hais tiag tiag li xwb tsis tau dag koj li nawd.”
    “Koj…, yog koj yeej hlub kuv tiag li hnub no koj tau nrog kuv tham lawm los cia kuv mam coj mus xav nawd,” Npauj Npaim hais rau Ntsuj Plig. Ntsuj Plig thiaj hais rau Npauj Npaim tias, “Kuv yeej hais tiag tiag li. Kuv mam ua li koj hais, mam nyob tos kom txog lub xyoo tshiab tawm tuaj tso mam coj koj los nrog kuv nyob nawd.”
    “Wsm…, uali os, Ntsuj Plig. Kuv mam cim koj cov lus cia os,” Npauj Npaim hais tag ces nws tig rov qab mus hlais nplej lawm.
    “Npauj Npaim,” Ntsuj Plig hais dua.
    Npauj Npaim tig loo rovqab los teb tias, “Abtsi os, Ntsuj Plig.”
    “Koj puas kam hlais los rau kuv pav mas lod?”
    “Wsm…, tau mas,” Npauj Npaim thiaj hlais cev los rau Ntsuj Plig ces Ntsuj Plig thiaj hais ntxiv tias, “Npauj Npaim, koj ua tiag hlais ib pliag kuv mam hlais nawd, vim kuv tseem xav xav saib koj li na.”
    “Wsm…, tau mas, Ntsuj Plig,” Npauj Npaim teb thiab rovqab tig mus hlais nplej lawm. Ntsuj Plig ke pav nplej ke ntsia Npauj Npaim.




    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Tue Mar 22, 2011 9:16 pm

    Npauj Npaim Txoj Kev Hlub, continues...,


    Hmo no tsaus ntuj, Npauj Npaim los pw mas nws pheej xav ntsoov txog Ntsuj Plig cov lus xwb. Nws thiaj seev tias, “Eb…, cas Ntsuj Plig wb nyuam qhuav sib ntsib tsis tau muaj pes tsawg hnub…., ua cas nws txawm siv hais txog qhov yuav yuav kuv lawm xwb es kuv yuav teb nws tau licas ne? Puas yog tias nws sai dhau lawm no? Wb nyuam qhuav sib ntsib xwb, nws txawm siv yuav tos kom tau kuv xwb xwb li no es uali nws puas yuav hlub kuv npaum li nws tej lus tiag? Txawm licas los mam nyob tos saib mus seb nws puas yuav hlub kuv tiag. Yog nws hlub kuv tiag los kuv yeej hlub nws thiab vim kuv yeej nyiam nws thaum kuv pom nws thawj zaug lawm.”
    “Npauj Npaim…, Npauj Npaim aj!” Npauj Npaim niam hu nws lawm ces nws thiaj teb tias, “Abtsi os, kuv niad?”
    “Koj pheej nyob ibtug niag mluas mluas li ntawd es tsis yog koj tsis xis neej lod?”
    “Aud, kuv niad, kuv tsis ua licas os,” Npauj Npaim teb.
    “Tsis ua cas ces kavtsij npaj yuav mus pw los mas,” Npauj Npaim niam hais rau nws tag ces nws thiaj mus pw lawm.



    Ntsuj_Plig
    Moderator

    Posts : 604
    Join date : 2011-02-15

    Re: Ncaim Cev Tsis Ncaim Siab

    Post by Ntsuj_Plig on Thu Mar 24, 2011 3:41 am

    Wow...........Zoo heev Npauj npaim, koj mus muab tau wb txoj kev hlub los lawm tiag los.
    Ua tsaug ntau nawb mog txij no kuv yuav niaj hnub tuaj nyeem os.




    bird love Pictures, Images and Photos

    "Koj xwb thiaj yog tus kuv hlub"

    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Thu Mar 24, 2011 7:25 pm

    Ntsuj Plig,





    Txawm tias wb ib leeg nyob ib sab ntuj,
    Yeej yuav tshem tsis tau wb txoj kev hlub,
    Txawm tias wb ib leeg ncaim mus nyob ib qhov,
    Los wb txoj kev sib hlub tseem nyob ruaj khov mog.




    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Thu Mar 24, 2011 7:37 pm

    Npauj Npaim Txoj Kev Hlub, continues...,

    Yuav Txog Pebcaug:

    Hnub tsis ntev hmo tsis ntau, txawm siv yuav txog pebcaug lawm tiag. Npauj Npaim niam niaj hnub nyob hauv tsev xaws khaubncaws rau Npauj Npaim thiab nws cov nus. Npauj Npaim thiab nws cov nus lawv thiaj yuav tau mus npaj dej npaj taws, npaj zaub mov noj. Npauj Npaim cov nus, muaj ob tug hlob nws. Nkawd niaj hnub mus txhib taws thiab kwv cavtaws los cia tau rauv. Npauj Npaim thiaj coj nws tus kwv yau nrog nws mus ev dej los ntim rau hauv cov thoob. Lub sijhawm no ces Ntsuj Plig los kuj khwv heev vim nws yuav tau mus npaj txhua yam rau nws tsev neeg lawm thiab ces nws kuj tsis xyeej tuaj ntsib Npauj Npaim li. Npauj Npaim mus ncig txog pem teb thiab mus txiav kav tsawb ces nws thiaj seev tias,

    “Eb…, vim licas tau ib ntus no tsis ntsib Ntsuj Plig li lawm ne? Puas yog tias nws khwv heev, yuav tau npaj txhua yam li peb thiab es thiaj tsis pom nws tshwm qhovtwg li? Hmmm…, los yog tias nws muaj dua hluas nkauj lawm es thiaj tsis tuaj ntsib kuv lawm xwb? Txawm licas los kavliam, cia kuv mam ua ib siab tos kom txog thaum txog pebcaug seb puas ntsib nws lawm.”

    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Thu Mar 24, 2011 7:46 pm

    Npauj Npaim Txoj Kev Hlub, continues...,

    Npauj Npaim xav li ntawd tag ces nws txawm hais kwvtxhiaj,

    Nijyai…, cas nim nce hlo lub toj nto tsis pom niaj tus dabtsi, yuav pom tag me noog kaus lim ya tawm mus haus paj zib, txiv leej tub…e…, cas yuav ntev ua luaj li no ntuj es wb twb tsis tau sib ntsib,

    Nijyai…, cas nim nce hlo lub toj nto tsis pom niaj tus dabtsi, yuav pom tag me noog kauslim ya tawm mus haus cua, txiv leej tub…e…, cas yuav tav li no ntuj es tsis pom koj ntauj taws tuaj wb sib cuag,


    Thaum Npauj Npaim tabtom hais kwvtxhiaj ces Ntsuj Plig tuaj txog ze rau ntawd, nws thiaj los xauj no cas yog Npauj Npaim tuaj txiav tsawb. Nws thiaj los hu tias, “Nyobzoo os, Npauj Npaim.”

    Npauj Npaim ceeb kiag ces nws thiaj tig loo los saib no yog Ntsuj Plig. Nws thiaj mam teb tias, “Nyobzoo os, Ntsuj Plig. Koj tuaj dabtsi txog ntawm tej chaw no ma?”
    “Kuv tuaj mus ncig seb puas pom koj ib pliag xwb. Hmoov zoo heev, kuv kuj tuaj ntsib koj lawm thiab. Uali koj nyob licas lawm xwb, puas nyobzoo thiab ma?”
    “Aws, kuv nyobzoo thiab mas,” Npauj Npaim teb.
    “Uali koj tuaj ib leeg xwb lod?” Ntsuj Plig nug.
    “Aws, kuv tuaj ib leeg xwb os,” Npauj Npaim teb.
    “Yog li puas kam nrog kuv tham ib pliag mas lod?” Ntsuj Plig nug.
    “Wsm…, tham ib pliag los tau mas,” Npauj Npaim teb tag ces Ntsuj Plig thiaj los ze zuj zus rau ntawm Npauj Npaim thiab los tuav Npauj Npaim tes. Nws hais rau Npauj Npaim tias, “Npauj Npaim, tau ntev lawm kuv tsis khoom tuaj ntsib koj li, thov zam txim rau kuv nawd.”
    “Ntsuj Plig, tsis ua licas os. Kuv los kuj tsis khoom li thiab,” Npauj Npaim teb.
    “Kuv twb tawm tuaj ob zaug pem nej teb tabsis tsis ntsib koj ces kuv thiaj rovqab mus tsev lawm. Hos naghmo kuv tuaj seb puas ntsib koj ua ntej koj mus pw tabsis kuv niam kom kuv nrog kuv ob tug muam tuav txhuv lawm ces kuv thiaj tsis khoom tuaj xwb. Kuv nco koj kawg li os.”
    “Ntsuj Plig, kuv yeej paub tias yuav txog pebcaug ces peb nyias muaj nyias haujlwm ua lawm. Txawm koj tsis khoom tuaj los kuv tsis xav licas vim kuv los twb tsis khoom kiag li thiab os mog,” Npauj Npaim teb rau Ntsuj Plig tag ces Ntsuj Plig thiaj hais tias, “Muab koj rab txuas los kuv mam txiav kav tsawb rau koj nawd.”
    Ntsuj Plig thiaj txiav tau ib kawg kav tsawb rau Npauj Npaim lub kawm ces nws pab Npauj Npaim ev. Nkawd thiaj los mus tsev lawm.




    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Thu Mar 24, 2011 7:56 pm

    Ntsuj_Plig wrote:Wow..............NpaujNpaim, koj sau tau dab neeg zoo tiag tiag li os tab sis tshuav ib qho Npauj Npaim tsis nco qab los yog Npauj Npaim tsis xav hais ne??? Cia Ntsuj Plig mam hias kiag seb......

    Lub sij hawm Ntsuj Plig tuaj ntsib Npauj Npaim zaum no zoo ib yam nkaus li txiv nraug hli tau ntsib niam nkauj hnub ib zaug dua. Thaum lub sij hawm Npauj Npaim thiab Ntsuj Plig nkawd tau sib ntsib lawm Ntsuj Plig thiaj rub zog Npauj Npaim los rau hauv nws xub ntiag thiab hais rau Npauj Npaim tias:

    "Npauj Npaim.... tau 2-3 hnub no cas kuv yuav nco koj ua luaj" Ntsuj Plig hais.
    "Ua cas ho nco ma Ntsuj Plig?" Npauj Npaim teb
    "Twb vim kuv xav puag koj rau hauv xub ntiag na" Ntsuj Plig hais
    "Puas tiag ma" Npauj Npaim teb
    "Tiag mas los kuv puag koj ib zaug seb?" Ntsuj Plig hais

    Thaum ntawv Npauj Npaim thiaj pw kiag rau Ntsuj Plig lub xub ntiag thiab Ntsuj Plig muab Npauj Npaim khawm ruaj ruaj thiab hais rau Npauj Npaim tias:

    "Xav kom txhob muaj tag kis cia wb nyob ua ke li no mus ib sim xwb" Ntsuj Plig hais
    "Kuv los xav li thiab yog ua tau yuav muab lub sij hawm cheem tseg tsis pub mus" Npauj Npaim teb

    Tom qab nkawd sib tham zoo siab lawm ua rau Npauj Npaim lub siab kaj npaum li cov hnub qub ntsa rau lub ntiaj teb hos NtsujPlig lub siab los huv npaum li lub ntuj ntsuab tsis muab huab ntis. Npauj Npaim thiab Ntsuj Plig nkawd thiaj sib tuav tes los mus tsev lawm xwb tiag...



    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Thu Mar 24, 2011 7:57 pm


    Ntsuj Plig,

    Tsis yog Npauj Npaim tsis nco qab hais na, yeej yog Npauj Npaim txhob txwm tseg seb Ntsuj Plig puas yuav hais tau ib los lus haum Npauj Npaim lub siab ntshaw xwb. Tabsis muaj hmoo heev uas Ntsuj Plig tseem nyeem tau Npauj Npaim lub siab xav lawm thiab yom, vim tias Npauj Npaim yeej nco thiab tos Ntsuj Plig txhua lub sijhawm li.

    Ua tsaug ntau qhov Ntsuj Plig tseem nyeem tau Npauj Npaim lub siab ntshaw lawm thiab mog.


    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Thu Mar 24, 2011 7:59 pm


    Npauj Npaim Txoj Kev Hlub, continues...,


    Thaum Npauj Npaim thiab Ntsuj Plig los txog tsev, Npauj Npaim niam zaum ntawm qhov rooj xaws khaubncaws. Nws txawm hu tias, "Nyobzoo os, metub. Koj tuaj lod?"
    "Aws, kuv tuaj os, niam phauj," Ntsuj Plig teb.
    "Ntsuj Plig, muab txo rau ntawm no os," Npauj Npaim hais kom Ntsuj Plig muab lub kawm txo rau ntawm hauvplag.
    "Aws," Ntsuj Plig teb thiab muab lub kawm txo rau ntawm hauvplag tag ces Npauj Npaim mus muab dej los rau Ntsuj Plig haus.

    Thaum nkawd haus dej tas, Npauj Npaim thiaj nug nws niam tias, “Kuv niad, koj puas tau noj mov os?”
    “Kuv tsis tau khoom ua mov noj li os, me ntxhais aw. Seb koj khoom no ces los npaj mov noj tsam koj txiv lawv los ces lawv tshaib tshaib lawm os mog,” nws niam teb.
    “Aws, ces kuv mam los npaj mas, kuv niad,” Npauj Npaim teb. Ntsuj Plig thiaj hais rau Npauj Npaim tias, “Npauj Npaim, ua li puas kam kuv pab thiab mas lod?”
    “Wsm…, tau kawg tabsis tsam koj yuav maj mus tsev ne,” Npauj Npaim teb.
    “Kuv twb hais rau kuv niam tias kuv yuav tuaj mus ncig uasi thiab yuav mus tsev lig kom lawv txhob tos kuv no ces kuv yeej npaj tuaj nrog koj nyob kom lig hos, puas tau ma?” Ntsuj Plig hais rau Npauj Npaim.
    “Tiag lod?” Npauj Npaim nug.
    “Tiag hod, vim twb xav nrog koj nyob kom ntev ntev ned,” Ntsuj Plig hais ntsia ntsoov rau Npauj Npaim ob lub qhovmuag. Npauj Npaim thiaj teb tias, “Wsm…, ces txhob ntshai kuv yuav txib koj pab kuv lawm laiv?”
    “Tau mas,” Ntsuj Plig teb thiab ntsia ntsoov Npauj Npaim lawm xwb. Nkawd thiaj ua hmo rau lawv noj tag ces Npauj Npaim thiab Ntsuj Plig nkawd los pab nws cov nus lawv txiav kabtsib. Thaum nkawd los txiav kabtsib ces Npauj Npaim tev tau ib tug kabtsib cev rau Ntsuj Plig hais tias, “Ntsuj Plig, noj kabtsib os.”
    Ntsuj Plig cev tes los txais thiab tuav Npauj Npaim sab tes, nws hais rau Npauj Npaim tias, “Koj nrog kuv noj thiab puas tau?”
    “Wsm…, tau mas,” Npauj Npaim teb.


    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Thu Mar 24, 2011 8:00 pm

    Npauj Npaim Txoj Kev Hlub, continues...,


    Tshuav tsis muaj pes tsawg hnub lawm xwb ces twb yuav txog pebcaug. Yog li lawv thiaj npaj kabtsib los nyoj ua suabthaj. Thaum lawv muab cov kabtsib los txiav tag ces twb yuav txog ib tag hmo. Ntsuj Plig thiaj hais rau Npauj Npaim tias, “Npauj Npaim, tej zaum kuv yuav tau mus lawm nawd.”
    “Aws, twb lig lig lawm ces koj kavtsij mus tsam koj niam nkawd txhawj txhawj koj lawm mog,” Npauj Npaim hais.
    “Aws, tagkis wb mam sib ntsib dua nawd,” Ntsuj Plig hais ntsia ntsoov rau Npauj Npaim.
    “Uali os. Ua tsaug ntau uas hnub no muaj koj tuaj pab kuv nawd,” Npauj Npaim hais.
    “Tsis ua licas. Ua tsaug koj tsis chim rau kuv nawd,” Ntsuj Plig hais.
    “Vim licas kuv thiaj chim rau koj ma?” Npauj Npaim nug.
    “Vim tias tseg tau ntev lawm kuv twb tsis tuaj nug koj moo. Kuv twb ntshai tsam ces koj tsis tos kuv lawm no na,” Ntsuj Plig hais luag ntxhi rau Npauj Npaim.
    “Wsm…, kuv tsis xav licas vim twb ze ze rau pebcaug lawm ces muaj ntau yam haujlwm yuav tau leg. Yog li kuv yeej nkagsiab lawm tias koj los yeej tsis khoom kiag li thiab, puas yog ma?” Npauj Npaim hais.
    “Wsm…, peb twb npaj txhua yam tag lawm, tsuas yog tias tseem yuav tos cov kwvtij tuaj ces mam mus tua npua thiab npaj mov tos txais lawv tuaj koom peb noj xwb,” Ntsuj Plig hais.
    “Vuag, nej twb npaj tag lawm tos noj lawm xwb lod?” Npauj Npaim hais.
    “Yog, tabsis kuv lub siab tsis kaj li, vim xav kom muaj koj nrog kuv nyob rau lub sijhawm ntawd na,” Ntsuj Plig hais luag ntxhi rau Npauj Npaim. Npauj Npaim thiaj teb tias, “Wsm…, kuv…, wsm…, ua tsaug koj tseem xam muaj kuv thiab nawd,” Npauj Npaim hais.
    “Npauj Npaim, kuv yeej xav li hod, es koj puas kam ma? Koj puas kam kuv tuaj coj koj mus nrog kuv nyob rau lub sijhawm ntawd thiab ma?” Ntsuj Plig nug.
    “Wsm…, tsis tau os,” Npauj Npaim teb.
    “Vim licas ma? Koj tsis hlub kuv lod?” Ntsuj Plig nug.
    “Wsm…, tsis yog li na,” Npauj Npaim teb ibtug mluas mluas thiab tig mus rau sab tod lawm. Ntsuj Plig thiaj cev tes mus tuav Npauj Npaim lub duav, rub nws tig los thiab hais rau nws tias, “Npauj Npaim, kuv yeej nyiam thiab hlub koj tiag tiag li kuv thiaj hais. Kuv yeej xav tias cia muab pebcaug noj tag tso kuv mam coj koj mus nrog kuv nyob no tabsis zoo li kuv….,” Ntsuj Plig tsis paub yuav hais licas lawm. Npauj Npaim thiaj hais rau nws tias, “Koj xav li tabsis wb nyuam qhuav sib paub tsis ntev no xwb es koj puas xav tias cia wb sib paub kom ntev mentsis tso no ma?”
    “Tabsis kuv…, kuv txhawj koj heev li na,” Ntsuj Plig hais.
    “Vim licas thiaj txhawj kuv ma? Kuv twb tsis mus qhovtwg li ned?” Npauj Npaim hais.
    “Lav tsis tau, vim tias koj yog ibtug neeg siab zoo thiab zoo nkauj heev li. Kuv txhawj tsam ces noj pebcaug tag ces koj hloov siab tsis paub kuv lawm xwb,” Ntsuj Plig hais ibtug lus tsuag tsuag thiab ntsia ntsoov rau Npauj Npaim. Npaum Npaim thiaj teb tias, “Ntsuj Plig, koj muab xav ntau dhau lawm os.”
    “Xav kom muaj li koj hais xwb tiag,” Ntsuj Plig hais. Npauj Npaim thiaj teb tias, “Kuv hlob luaj no tsis tau muaj leej twg uas kuv yuav cia siab tau rau li. Tabsis kuv xav lawm tias koj yuavtsum yog tus ntawd rau kuv lawm no es uali koj puas yog ma, Ntsuj Plig?”
    “Npauj Npaim, koj xav li thiab lod?” Ntsuj Plig nug.
    “Wsm…, kuv yeej xav li rau koj txij hnub koj tuaj pab peb hlais nplej los lawm,” Npauj Npaim teb thiab ntsia ntsoov rau Ntsuj Plig. Ntsuj Plig thiaj rub Npauj Npaim los puag rau xubntiag thiab hais rau nws tias, “Npauj Npaim, thov txhob dag kuv nawd.”
    “Ntsuj Plig, kuv yeej hais tiag tiag xwb tsis tau dag koj thiab xav tias yuav tsis dag koj li. Yog koj muaj siab tiag no thov txhob cia kuv tag kev cia siab nawd,” Npauj Npaim hais. Ntsuj Plig thiaj teb tias, “Wsm…, tau kawg.”
    Nkawd nyob ntev loo nraum zoo ces Npauj Npaim niam thiaj tuaj hu tias, “Npauj Npaim, koj dua twg lawm na?”
    “Kuv niad, kuv nyob nov xwb os,” Npauj Npaim teb.
    “Twb lig lawm ces los tsev mas,” Npauj Npaim niam hais.
    “Aws, kuv mam los os,” Npauj Npaim teb nws niam tag ces nws hais rau Ntsuj Plig tias, “Ntsuj Plig, kuv yuav tau mus tsev lawm, mam ntsib koj dua lwm zaus nawd.”
    “Wsm…, tagkis kuv mam rovqab tuaj pab koj nawd,” Ntsuj Plig hais tag ces nkawd thiaj sib ncaim lawm.

    To Be Continues...,


    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Thu Mar 24, 2011 8:03 pm

    Ntsuj_Plig wrote:Lub sij hawm Ntsuj Plig ncaim Npauj Npaim mus lawm ua rau Ntsuj Plig lub siab nyob tsis tus ua loj ua lug rau Npauj Npaim thiab tseem xav ntsoov thaum Npauj Npaim thiab Ntsuj Plig nkawd sawv ua ke. Ntsuj Nplig nco Npauj Npaim heev thaum mus txog tsev noj hmo tag Ntsuj Plig txawm cia li mus pw tab sis lam mus pw xwb los yeej tsis tuaj ib tug dab ntub vim nyob hauv nws lub siab tsuas xav ntsoov rau Npauj Npaim xwb.

    Ntsuj Plig thiaj xav tias "Ab....Kheev lam muaj hmoo kuv ho tau Npauj Npaim los ua kuv nyab ntshe lub xyoo tshiab no yuav tshav ntuj nrig rau kuv zoo tam li ib cim paj tawg mus puv nras tiag" tab sis yog Npauj Npaim dag kuv xwb nws ho mus yuav lwm tus lawm ntshe yuav ua rau kuv ib leeg nyob zoo tam li tej me noog zaum ib pob saum ntsis ntoo quaj mus ntsia lub ntuj xwb tiag.


    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Thu Mar 24, 2011 8:04 pm


    Ntsuj Plig,

    Hmmm..., kuv los kuj xav paub tias seb leej twg yuav dag leej twg thiab no tiag, hehehehee,

    Zoo siab tau hnov koj cov lus zoo os.

    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Thu Mar 24, 2011 8:06 pm

    Npauj Npaim Txoj Kev HLub, continues...,


    Tagkis ntawd Npauj Npaim sawv los ua tshais noj tag. Nws nug nws niam tias, “Kuv niad, hnub no es peb yuav ua dabtsi ua ntej os?”
    Npauj Npaim niam thiaj hais rau nws tias, “Me Npauj Npaim.”
    “Abtsi os, kuv niad,” Npauj Npaim teb.
    “Muab ib cov txhuv nplaum los tsau kom ntau es ib tsam peb yuav tuav ncuav nawd. Kavtsij mus hais txhuv los tau tag es kuv mam qhia koj seb yuav npaj dabtsi ua ntej os.”
    “Aws, ua li os, kuv niad,” Npauj npaim teb tag ces nws mus yawm txhuv los tsau. Thaum nws tseem tabtom tsu txhuv xwb ces Ntsuj Plig twb tuaj txog lawm. Ntsuj Plig thiaj hu tias, “Nyobzoo os, Npauj Npaim.”
    “Oh, koj twb tuaj lawm lod? Cas yuav tuaj ntxov ua luaj ma?”
    “Uacas, tsis tau xav pom kuv lod?” Ntsuj Plig nug.
    “Tsis yog na, kuv xav tias ntshe yuav yog lig koj mam tuaj no xwb os,” Npauj Npaim hais tag ces Ntsuj Plig thiaj teb tias, “Naghmo kuv twb hais rau koj tias tagkis kuv mam tuaj pab koj dua no ned, koj twb tsis nco qab lawm lod?”
    “Tsis yog li na. Kuv nco mas tabsis…, “ Npauj Npaim tseem teb tsis tau tag ces nws niam twb tawm tuaj hu tias, “Nyobzoo os, metub.”
    “Aws, nyobzoo os, niamphauj,” Ntsuj Plig teb.
    “Kuv niam, npaum li no puas tau txaus os,” Npauj Npaim yawm tau ob thoob txhuv thiab nug nws niam. Nws niam thiaj teb tias, “Tejzaum nyaj yuav txaus lawm os. Ces mus muab kawm los yawm cov kabtsib peb yuav coj mus nyoj los ua suabthaj ib tsam thiaj tau ntsw ncuav noj os.”
    “Aws, ua li os, kuv niad,” Npauj Npaim teb nws niam tag ces Ntsuj Plig thiaj hais rau Npauj Npaim tias, “Koj twb npaj dej los tsau koj cov txhuv lawm lod?”
    “Wsm…, kuv twb npaj tag lawm os,” Npauj Npaim teb tag ces nkawd thiaj muab dej los tsau cov txhuv. Thaum nkawd tsau cov txhuv tag, Npauj Npaim hais rau Ntsuj Plig tias, “Ntsuj Plig, koj tuaj pab kuv li no es leej twg ho pab koj niam lawv ma?”
    “Aud, txhob txhawj os, kuv niam peb twb npaj txhij tag lawm tsuas yog tshuav tej yam me me lawm xwb os,” Ntsuj Plig teb. Npauj Npaim thiaj hais ntxiv tias, “Vaud, ces nej yuav rawm ua luaj txawm siv npaj tau txhua yam tag lawm os.”
    “Aws, vim kuv cov muam ob peb tug ces ib leeg ua ib qhov xwb twb tag lawm os. Kuv xav tias yog muaj koj pab thiab no ntshe yim huab tag sai nod,” Ntsuj Plig hais luag ntxhi rau Npauj Npaim. Npauj Npaim thiaj teb tias, “Kuv niag qeeb qeeb li es xyov koj puas xav tau los pab koj li os.”
    “Kuv twb xav kom muaj koj pab kuv thiaj tuaj. Yog tias kuv tsis xav kom muaj koj pab kuv ces kuv yeej tsis tuaj li os, Npauj Npaim. Koj puas paub tias lub sijhawm kuv pab kuv cov muam, kuv xav kom koj yog tus pab lawv thiab no na?”
    “Ua tsaug qhov koj xav tau zoo rau kuv os. Uali koj muaj pestsawg tus muam na?”
    “Kuv muaj ib tug muam hlob hos ob tug muam yau kuv os,” Ntsuj Plig teb.
    “Lod, es ua li nej muaj pes tsawg tus kwvtij thiab no?”
    “Peb muaj tsib leeg diam es uali koj puas nyiam ib tsev neeg coob coob li peb mas lod?” Ntsuj Plig nug.
    “Wsm…, zoo heev uas nej muaj coob tus ces ib leeg ua ib qhov xwb tej haujlwm twb tiav tag lawm os,” Npauj Npaim hais tag ces Ntsuj Plig nug ntxiv tias, “Koj twb tsis tau teb kuv lolus nug ne?”
    “Aud, kuv puas nyiam ib tsevneeg coob coob li nej no lod?”
    “Kuj yog, uali puas nyiam tiag ma?”
    “Nyiam los mas, peb los twb coob coob thiab ned. Kuv tsis tau qhia koj xwb, kuv muaj ob tug nus hlob uas kuv niam nkawd muab xa mus kawmntawv nram moos lawm. Ob peb hnub saum no ces nkawd yuav rovqab los nrog peb noj pebcaug thiab os. Hos ob tug nus yau no ces kuv niam nkawd tsis tau pub mus, yuav yog lwm xyoo seb kuv niam puas tso nkawd mus no os,” Npauj Npaim hais.
    “Aud lod?” Ntsuj Plig nug.
    “Aws, yog mas. Uali nej twb tuav ncuav tag lawm thiab lod?”
    “Peb tseem tsis tau tuav os,” Ntsuj Plig hais.
    “Yog li ib tsam puas kam tuaj pab peb tuav thiab no?” Npauj Npaim nug ntsia ntsoov rau Ntsuj Plig. Nws thiaj teb tias, “Yog koj kam ces kuv yeej pab kawg los mas.”
    Npauj Npaim niam hnov nkawd tham ces nws txawm teb tias, “Aud, metub, ua tsaug ntau os. Ib chim tsaus ntuj ces kuv ob tug tub hlob los txog lawm es peb thiaj yuav npaj tuav ncuav no. Yog koj xyeej sijhawm los ho tuaj nrog peb nyob noj ncuav os mog.”
    “Aws, uali os, niam phauj,” Ntsuj Plig teb.



    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Thu Mar 24, 2011 8:07 pm


    Npauj Npaim Txoj Kev Hlub, continues...,


    Hnub no Ntsuj Plig tuaj pab Npauj Npaim thiab nws niam lawv nyoj kabtsib ib hnub tsaus ntuj ntais. Lawv nyoj tau ntau heev li thiab muab ntim tag cia. Npauj Npaim los ua hmo rau lawv noj ces tabtom nws ob tug nus ho los txog tsev lawm thiab. Npauj Npaim thiaj hais rau Ntsuj Plig tias, “Ntsuj Plig, ob tug no yog kuv ob tug nus os. Tus sab laug hu ua Npis hos tus sab xis hu ua Nplooj no os.”
    Ntsuj Plig thiaj tuav nkawd tes hais nyobzoo rau nkawd thiab. Ntsuj Plig los pab Npauj Npaim rau mov rau lawv noj. Tomqab lawv noj mov tag, lawv mam los tuav ncuav. Ntsuj Plig kuj pab Npauj Npaim cov nus tuav ncuav tag nws mam mus tsev. Thaum nws yuav mus tsev, nws hais rau Npauj Npaim tias, “Npauj Npaim, kuv yuav mus tsev es cia seb tagkis kuv puas muaj sijhawm tuaj saib koj lawm mog.”
    “Aws, hnub no koj twb tuaj pab kuv ib hnub lawm ces tagkis koj kavtsij nyob pab koj niam lawv mog,” Npauj Npaim hais luag ntxhi thiab ntsia ntsoov rau Ntsuj Plig. Ntsuj Plig hais ntxiv tias, “cov npawg, niam phauj, thiab yawglaus, kuv yuav tau mus lawm nawd.”
    “Aws, mus zoo koj od,” Npauj Npaim cov nus thiab nws niam nws txiv lawv tseem nrog Ntsuj Plig tham ces nws thiaj los ntim tau ob peb lub ncuav yuav muab rau Ntsuj Plig nqa mus tsev. Thaum Ntsuj Plig mus las lawv tag, nws los rau ntawm Npauj Npaim. Npauj Npaim thiaj hais rau Ntsuj Plig tias, “Ntsuj Plig, ua tsaug ntau uas hnub no koj pab kuv ib hnub tsaus ntuj ntais mog. Tsis muaj abtsi tabsis muab ob peb lub ncuav no rau koj nqa mus rau koj niam noj xwb mog.”
    Ntsuj Plig ntsia Npauj Npaim nruj nruj thiab teb haistias, “Npauj Npaim, ua tsaug os. Kuv yuav nco ntsoov lub sijhawm no, hnub no, mus kom tag kuv lub sim neej li os. Mam ntsib koj dua mog.”
    “Aws, mus zoo koj nawd,” Npauj Npaim xa Ntsuj Plig.


    To Be Continues...,


    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Thu Mar 24, 2011 8:22 pm

    Txog Peb Caug Lawm Tiag:


    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Thu Mar 24, 2011 8:40 pm

    Npauj Npaim Txoj Kev Hlub, continues...,

    Hnub tsis ntev, hmo tsis ntau, ib pliag xwb twb txog peb Hmoob lub pajtsiab pebcaug lawm tiag. Lub me ntuj huvsi, cua tuaj laj ntxiag nrog rau tus me duab tshav ntuj tuaj ci ntsa iab. Txhua lub tsev hnov npua thiab qaib quaj zomzaws. Vim hnub no yog ib hnub tseemceeb ntawm peb haiv Hmoob. Tej vim neeg ua neej muaj ces tua npua noj, tej yim neeg tsis muaj npua tua los yuavtsum muaj qaib tua los noj thiab npaj yuav hu plig pebcaug. Yog li Npauj Npaim txiv thiab cov nus lawv tabtom mus ntes lawv tus las npua los tua hos Npauj Npaim nrog nws niam tua ib cov qaib thiab. Lawv npaj ib hnub tsaus ntuj thiaj npaj tiav ces Npauj Npaim txiv thiaj los hu lawv tsevneeg plig txhua tug. Lub sijhawm no tabtom yuav tsaus ntuj, neeg zejzog hu plig zomzaws lawm. Hnov me suab tswbneeb nrov zomzaws tau kho siab zim xwb. Npauj Npaim lub siab nyob tsis tus vim nws xav tias,

    “Eb…, cas sijhawm yuav dhau mus sai ua luaj? Tagkis xwb ces twb yog hnub xiab ib ntawm peb Hmoob lub pajtsiab pebcaug lawm tiag. Cas zoo li kuv lub siab ntxov heev li ned, puas yog tias vim kuv xav txog Ntsuj Plig ntau dhau lawm xwb ned?”


    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Thu Mar 24, 2011 8:42 pm


    Npauj Npaim Txoj Kev Hlub, continues...,


    Npauj Npaim tseem tabtom xav tsis nco qab ntxuav qaib lawm. Nws niam thiaj hu nws tias, “Npauj Npaim, tsis yog koj tsis xis neej los, me ntxhais.”
    “Oh, kuv tsis ua cas os, kuv niad,” Npauj Npaim teb nws niam. Nws niam thiaj hais rau nws tias, “Ntxuav qaib tag no ces los muab cov mov nplaum no cub thiab nawd.”
    “Aws, uali os, kuv niad,” Npauj Npaim teb nws niam tag ces nws thiaj muab cov qaib ntxuav thiab muab los vom rau hauv laujkaub. Nws ho mus muab cov mov nplaum los cub thiab. Thaum nws muab cov mov cub tag, nws tawm mus nqa lub vab los npaj cia yuav fob mov ces nws txawm hnov ib lub suab hu nws tias, “Npauj Npaim.”
    Npauj Npaim thiaj tig loo los saib no ua ciav yog Ntsuj Plig. Nws thiaj teb tias, “Nyobzoo os, NtsujPlig. Koj tuaj lod?”
    “Aws, kuv tuaj saib koj ib pliag xwb vim tau ob peb hnub no tsis tau ntsib koj lawm.”
    “Aud, ua tsaug uas koj tseem tuaj saib kuv thiab,” Npauj Npaim teb rau Ntsuj Plig. Ntsuj Plig thiaj hais ntxiv tias, “Npauj Npaim, hnub no peb tua nyuj noj es tsis muaj koj nrog kuv noj, ua rau kuv nco koj heev li os. Kuv nqa tau me me no tuaj rau koj es koj muab mus ua rau koj tsev neeg noj mog.”
    “Vuag! Kuv txais puas tau ma?” Npauj Npaim nug NtsujPlig tag ces NtsujPlig thiaj teb tias, “Yog koj tsis kam txais ces kuv mam nqa mus rau koj niam mas vim kuv yeej txaus siab nqa tuaj rau nej noj tiag tiag li os.
    “Yog li no koj yuav tau nqa mus cob rau kuv niam vim kuv tsis paub tias kuv niam puas kam kuv txais os mog,” Npauj Npaim hais tag ces nkawd thiaj mus rau hauv lawv tsev, NtsujPlig thiaj nqa qhov nqaij mus hais rau Npauj Npaim niam tias, “Nyobzoo os, Niamphauj.”
    “Nyobzoo os, metub. Koj tuaj lod?” Npauj Npaim niam hu.
    “Aws, kuv tuaj os. Niamphauj, hnub no peb tua nyuj noj es kuv niam muab tau ib qhov no rau kuv nqa tuaj rau nej noj no,” Ntsuj Plig hais thiab cev qhov nqaij rau Npauj Npaim niam. Npauj Npaim niam thiaj teb tias, “Aud, koj niam tsis cia li es tseem muab nqaij rau koj nqa tuaj pub peb noj thiab los, metub.”
    “Aws, kuv niam yeej txaus siab muab rau kuv nqa tuaj rau nej noj es thov txais mus cia rau nej noj nawd,” Ntsuj Plig hais thiab cev rau leej niam txais. Npauj Npaim niam thiaj cev tes los txais thiab hais tias, “Ua tsaug os, metub.”
    “Aws, tsis ua licas,” Ntsuj Plig teb tag ces Npauj Npaim thiaj hais ntxiv tias, “Ua tsaug os, Ntsuj Plig.”
    “Wsm…, tsis ua licas,” Ntsuj Plig teb thiab hais ntxiv tias, “Kuv tuaj ib pliag li no xwb, mam ntsib koj rau tagkis mog.”
    “Aws, mam ntsib koj rau tagkis nawd,” Npauj Npaim teb tag ces Ntsuj Plig mus lawm.


    Npauj Npaim
    Moderator

    Posts : 1385
    Join date : 2011-02-11
    Age : 41

    Re: Ncaim Cev Tsis Ncaim Siab

    Post by Npauj Npaim on Thu Mar 24, 2011 8:44 pm

    Hnub Xiab Ib:


    Hnub xiab ib tawm tuaj lawm tiag, Npauj Npaim sawv ntxov ntxov los npaj tshais rau lawv noj tag ces nws niam muab lawv cov zam tshiab los rau lawv hnav. Tomqab lawv hnav zam tshiab tag ces lawv tuaj mus rau pem lub tiaj uasi. Thaum lawv tuaj txog ped ces neeg twb tuaj coob coob lawm. Npauj Npaim nrog nws niam tuaj txog ces nws tseem txaj txaj muag tsis tau kam mus pov khaubhnab rau leejtwg li. Npauj Npaim niam lawv ib tug phauj tuaj pom Npauj Npaim thiab nws niam ces nws txawm los hu tias, “Aud, nyobzoo os, nyab.”
    “Nyobzoo os, phauj, koj tuaj lod?” Npauj Npaim niam hais.
    “Aws, kuv tuaj mas,” tus phauj teb tag ces nws txawm hais ntxiv tias, “Uali tus me ntxhais no puas yog neb tus me Npauj Npaim naj?”
    “Yog los mas, phauj,” Npauj Npaim niam teb.
    “Vuag! Tau ob peb xyoos no tsis tau sib ntsib lawm xwb, neb tus me ntxhais hlob tau ntximhlub thiab zoonkauj heev li lawm os, nyab aw,” tus phauj hais.
    “Yog mas, tau ob peb xyoos no tsis ntsib koj lawm es nej puas nyobzoo os, phauj?” Npauj Npaim niam nug.
    “Nyobzoo kawg mas,” tus phauj teb.
    “Uali koj tuaj xwb los nej tsawg leej tuaj os?” Npauj Npaim niam nug.
    “Peb tuaj tag nrho os vim niamtais laus laus lawm ces peb tuaj saib niamtais thiab os,” tus phauj teb rau Npauj Npaim niam.

    To be continues...,

    Ntsuj_Plig
    Moderator

    Posts : 604
    Join date : 2011-02-15

    Re: Ncaim Cev Tsis Ncaim Siab

    Post by Ntsuj_Plig on Fri Mar 25, 2011 4:17 am

    Thanks Npauj Npaim

    Kav tsij tuaj sau cia kom wb lub neej thiaj tsis ploj hauv lub ntiaj teb mus mog
    kuv mam yog tus nyeem cia koj ua tus sau thaum wb sib tau kuv mam them koj tej kev hlub
    yuav tsis pub kom nws nkim lub sij hawm os mog....




    bird love Pictures, Images and Photos

    "Koj xwb thiaj yog tus kuv hlub"

    Sponsored content

    Re: Ncaim Cev Tsis Ncaim Siab

    Post by Sponsored content Today at 3:26 pm


      Current date/time is Thu Dec 08, 2016 3:26 pm