Ncaim Cev Tsis Ncaim Siab

Yog koj hlub nws npaum li koj hais,
Koj yeej yuav tsis tso nws ncaim pais,
Yog koj hlub nws tag npaum li no,
Koj yeej tsis cia nws nyob nrog teev kua muag nrog,

Txoj kev nco qhia tsis tau txoj kev hlub thiaj tsis pom
Kheev lam yog zoo tus dej thiab tus ntses cia kuv mam ntes
kiag nws coj mus nyob ua ke thiaj tsis mob lub siab khi rhe mog....

Ua li mas, Ntsuj Plig. Kuv twb npaj yuav muab wb zaj dabneeg los sau mus ntxiv rau hauv no es koj puas xav licas na?

Tau mas Npauj Npaim

Kav tsij coj los sau cia os mog, nco ntsoov tias txhua yam yuav tsum yog sau tseg xwb thiaj tsis ploj
yog tsis li lwm hnub ploj mus lawm yuav nrhiav tsis tau thiab yuav tu siab heev li na...

Ua tsaug ntau os, kuv twb xav muab tso rau tabsis vim tsis tau nug koj ces kuv thiaj tseem tos xwb. Yog koj kam ces kuv yuav muab tso rau hauv no thiab sau kom tag zaj dabneeg os.

Ua tsaug nawd.

Npauj Npaim.........

Txhob poob siab os, kav tsij muab los tso rau hauv no lwm tiam wb thiaj tau rov los nyeem os mog
thiab yog tseem nco tau yuav khaws lub tsev no ua wb lub mus ib sim na...

Npauj Npaim Txoj Kev Hlub, continues...,


Muaj ib hnub Npauj Npaim nrog nws cov vivncaus mus ris dej nram hav dej ces nws mus ntsib ibtug tubhluas hu ua, "Ntsuj Plig" no. Npauj Npaim muab nws lub raj dej los ce dej tag ces nws tseem tabtom yuav muab ntim rau hauv nws lub kawm ev xwb ces Ntsuj Plig tuaj txog ntawd thiab. Npauj Npaim cov vivncaus twb ev lawv cov raj thiab mus zomzaws ua ntej lawm. Npauj Npaim pom dheev Ntsuj Plig, nws lub siab poob nthav tias, "Vuag! Cas tus hluas no yuav zoo nraug ua luaj? Ntuj aw..., nws tuaj qhovtwg tuaj ne?"

Thaum Ntsuj Plig tuaj pom dheev Npauj Npaim, nws ua qhov muag nruj nruj rau Npauj Npaim ces ua rau Npauj Npaim ntshai thiab cev tes los muab tsis tau nws txoj hlua kawm li. Nws muab nws lub kawm ua vau ces cov raj dej ciali vau tag lawm thiab. Npauj Npaim txajmuag heev, nws cia li tsis paub ua licas lawm. Ntsuj Plig saib ua cas Npauj Npaim cov raj dej vau lawm ces nws thiaj khiav loo los pab tsa thiab hais rau Npauj Npaim tias, "Vuag! Tus muam, ua licas rau koj lawm os? Koj cov raj na, nws nchuav tag lawm."

Npauj Npaim thiaj tig mus khaws nws cov raj ces Ntsuj Plig los hais rau Npauj Npaim tias, "Tus muam, cia kuv mam pab koj nawd."
"Wsm..., tau lawm, kuv mam khaws kuv xwb los yeej tau," Npauj Npaim teb rau Ntsuj Plig thiab tig los saib Ntsuj Plig dua. Ntsuj Plig saib Npauj Npaim nruj nruj tsis ntsais muag li thiab. Nkawd sib ntsia ib pliag ces Npauj Npaim tus niamhluas hu nws tias, "Npauj Npaim, ua cas rau koj lawm na? Tsuag tsuag los peb yuav mus ma."

Tom qab Ntsuj Plig tau ntsib Npauj Npaim ib vuag dhau mus ua rau nyob hauv Ntsuj Plig lub qhov muag cia li kaw tau Npauj Npaim tus duab cia lawm. Thaum Npauj Npaim thiab nws cov viv ncaus mus dhau lawm los Ntsuj Plig tseem pheej sawv ntawm ntug dej tsis nco qab mus tsev.

Nyob hauv Ntsuj Plig lub siab xav tias "Ab......hnub no yog npau suav los tiag ne ua cas yuav cia li ntsib tau ib tug ntxhais zoo nkauj thiab ntxim hlub ua luaj tab sis ua cas thiaj tsis muaj lub sij hawm tau nrog nws tham li, yog nws cov dej txhob nchuav ntshe kuv twb tsis tau los pab nws thiab xyov puas yuav tau hais ib lo lus rau nws li os." Thaum Ntsuj Plig tab tom xav li no ntsia ua cas Npauj Npaim lawv twb nce yuaqv nto toj, Ntsuj Plig thiaj ua ib siab los mus tsev lawm. Hmo ntawv Ntsuj Plig lub siab ua nyuj nyes ib hmos tsis tuaj ib tug dab ntub vim txoj kev xav txog Npauj Npaim tus neeg zoo lus thiab ntxim hlub xwb.


Tus sau yog, "Ntsuj Plig"

Npauj Npaim Txoj Kev Hlub, continues...,

Npauj Npaim tus niamhluas hu nws tag ces nws txawm muab nws cov rajdej ntim kiag rau hauv lub kawm ces Ntsuj Plig hais rau Npauj Npaim tias, "Leej muam, cia kuv mam nqa rau koj ev os."
Npauj Npaim tsa hlo qhovmuag los saib Ntsuj Plig ib pliag ces nws teb tias, "Aws, ua tsaug ntau os, leej nus."
Npauj Npaim cia li los mus lawm ces Ntsuj Plig tsis hais licas ntxiv lawm.

Thaum lawv los txog tsev, Npauj Npaim muab cov raj thau ib lub zuj zus cia, nws tseem pom Ntsuj Plig tus duab hauv nws lub zeem muag. Ua rau nws xav twj ywm tias, "Ab..., cas hnub no yuav ntsib ibtug nus zoonraug ua luaj li ned? Uali nws tuaj qhov twg tuaj ua cas kuv ho tsis tau pom dua li ne? Wsm..., puas yuav muaj hnub rovqab tau ntsib nws dua lawm ned?"

Npauj Npaim niam thiaj hu nws tias, "Npauj Npaim, koj pheej nyob tug niag zoo li feeb tsis meej es tsis yog koj mob lawm lod?"
"Kuv niad, kuv tsis mob os," Npauj Npaim teb nws niam. Nws niam thiaj hais rau nws tias, "Yog tsis mob qhov twg ces los ua hmo noj vim twb tsaus ntuj lawm ma."

Npauj Npaim ua hmo noj tag, txog caij mus nce chaw pw, nws pw tsis tsaug zog vim nws lub siab pheej xav ntsoov txog Ntsuj Plig xwb. Nws nyob lig lig mam tsaug zog ces nws ua npausuav tias nws tabtom taug kev yuav mus ua teb cas nws ntsib Ntsuj Plig tuaj txog pem kev. Ntsuj Plig hais rau nws tias, "Nyobzoo os, leej muam, koj yuav mus dabtsi os?"
"Kuv mus uasi xwb, koj yog....?" Npauj Npaim tseem tab tom yuav nug seb nws puas yog tus tubhluas uas nws tau ntsib hnub no xwb ces nws txawm tsim dheev los lawm thiab.

Npauj Npaim & Ntsuj Plig, txoj kev hlub,


Hmo ntawd tom qab uas NtsujPlig tau mus pw ua rau Ntsuj Plig ua npau suav pom Npauj Npaim lub suab luag ntxhi nyob nrog Ntsuj Plig tsis ploj, ua rau Ntsuj Plig cia li muab Npauj Npaim nyiag nco nyob hauv lub siab tsis paub tseg. Kaj Ntug hnub tom qab lub sij hawm Ntsuj Plig thiab nws cov phooj ywg tab tom rov qab los mus tsev, lawv tseem los tshwm rau ntawm ib lub me nyuam zos ib thaj teb npleg uas twb hais tag hav quav nplej tseem daj rhuv. Ntuj Plig ntsia nram tiaj ua cas pom 2 niam tub tab tom taug kev yuav mus rau tim hmoob cov tsev, Ntsuj Plig thiab nws cov phooj ywg thiaj rau siab ntso los caum kiag tau nkawd saib no ua cas yog Npauj Npaim thiab nws niam.

Ntuj Plig thiaj tsa ncauj hu tias "Niam tais neb yuav mus dab tsi na?" Npauj Npaim niam teb tias "Cov me tub wb yuav rov tuaj mus tom qub zog xwb os, nej mus dab tsi thiab?" Ntsuj Plig teb tias "Oh....Peb yuav rov los mus tsev xwb" thiab txawm nug ntxiv tias "Niam tais tus ntawm koj yog koj tus nyab los tus ntxhais na?" Npauj NPaim niam teb tias "Me tub yog kuv tus ntxhais xwb os" Ntsuj Plig nug ntxiv tias "Niam tais nws npe hu li cas thiab puas tau muaj txiv?" Npauj Npaim niam tsis tau teb tab sis Npauj Npaim teb ntua tias "Kuv muaj txiv lawm ov..." Npauj Npaim niam thiaj teb tias "Me tub nws hu ua Npauj Npaim no thiab tsis tau muaj txiv os". Thaum Ntsuj Plig hnov li no lawm thiaj mam hu tias "Nyob zoo os Npauj Npaim" Npauj Npaim los kuj teb tias "nyob zoo mas leej nus koj npe hu li cas?" Ntsuj Plig teb tias kuv hu ua "Ntsuj Plig no".

Thaum ntawd Ntsuj Plig los muab Npauj Npaim ntsia qhov muag tsis paub ntsais hos Npauj Npaim los kuj muab Ntsuj Plig ntsia tsis paub mus kev, Ntsuj Plig thiab Npauj Npaim nkawd thiaj cia li nres thiab sib tham ob-peb los. Ntsuj Plig nug tias "Npauj Npaim koj niam neb yuav mus qhov twg?" Npauj Npaim teb tias "Wb yuav rov mus ev khoom tom qub zog Paj Dawb". Npauj Npaim nug tias "Ntsuj Plig nej nyob qhov twg nab?" Ntsuj Plig teb thiab taw tes tias "Peb nyob puag tim lub qab roob tsuas dawb paug tid los hauv" Npauj Npaim nug ntxiv tias "Ntsuj Plig nej lub zos hu li cas na?" Ntsuj Plig teb tias "Tsua Xyuam Yaj os Npauj Npaim."

Npauj Npaim thiab Ntsuj Plig sib tham tsis muaj pes tsawg lo lub sij hawm twb dhau mus lawm ntev tsawv Npauj Npaim niam thiaj li hu tias Npauj Npaim wb mus tsam tsaus ntuj wb mus tsis txog os. Thaum ntawd ua rau Npaum Npaim los siab dai dhuam rau Ntsuj Plig hos Ntsuj Plig los siab quaj dhi rau Npauj Npaim, tab sis lub caij nyoog dhau lawm zuj zus Ntsuj Plig thiaj ua siab tso Npauj Npaim mus. Ntsuj Plig hais rau Npauj Npaim tias "Npauj Npaim ua ntej koj yuav mus puas kam kuv tuav koj txhais tes ib zaug?" Npauj Npaim teb tias "Txhais tes xwb tau kawg mas Ntsuj Plig" thiab cev tes tuaj. Thaum Ntsuj Plig tuav tau Npauj Npaim txhais tes dawb mos nyoos haj yam ua rau Ntsuj Plig lub siab dhia pig poog. Lub sij hawm ntawd Npauj Npaim los muab Ntsuj Plig ntsia tsis xav mus hos Ntsuj Plig los tsis xav tso Npauj Npaim ob sab tes, tab sis thaum kawg Ntsuj Plig kuj maj mam tso Nkauj Npaim tes thiab hais rau Npauj Npaim tias "Npauj Npaim yog mus tsuag tsuag koj niam neb ho los mog" Npauj Npaim los kuj teb tias ua li os Ntsuj Plig cia seb puas muaj hmoo wb puas tau sib ntsib lawm os mog." Ces Npauj Npaim thiab nws niam txawm cia li ncaim mus lawm.

Tus sau yog, "Ntsuj Plig"

Npauj Npaim Txoj Kev Hlub, continues...,

Tagkis ntawd pom kev ces Npauj Npaim niam los hais rau nws tias, “Npauj Npaim aw.”
“Dabtsi os, kuv niad.”
“Koj muab cov mov cub kom sov, muab cov zaub no los cub kom siav, thiab muab plaub tsib daim nqaij nyuj quav los ci tsoo kom zooj ntim wb su es wb yuav rovqab mus nram qub zog mus nqa qee yam khoom los tau siv nawd.”
“Aws, uali os, kuv niad. Es wb yuav mus pw los mus rovqab los ma?”
“Tejzaum mus ib tsam tsaus ntuj ces wb yuav tau rovqab los vim tshuav tej qaib npua tsis muaj neeg pub,” Npauj Npaim niam hais tag ces nws tawm mus lawm. Npauj Npaim thiaj los muab cov mov cub thiab ntim su raws li nws niam hais.

Thaum Npauj Npaim thiab nws niam tuaj mus txog rau nram ib tog kev yuav mus lawm tim Hmoob zos, Npauj Npaim pom ib cov tubhluas los tuaj txog ze thiab zoo li tuaj ncaj nraim los rau ntawm Npauj Npaim nkawd. Npauj Npaim thiab nws niam nkawd los ze zujzus zoo li Npauj Npaim twb yuav paub lawv thiab. Nws thiaj xav zoj tias, “Ab…, cov neeg ntawd yog leejtwg ne? Zoo li kuv twb pom dua lawm tabsis tsis paub lawv npe xwb.”

Thaum Npauj Npaim nkawd tuaj mus ze rau ntawm cov tubhluas ntawd, nws thiaj ua tibzoo saib no uacas yog tus tubhluas uas nws ntsib nram hav dej. Nws thiaj seev tias, “Vuag, tus ntawd zoo li yog tus kuv ntsib nram hav dej sad?”
Npauj Npaim cia li nres kiag nyob hauv kev saib xwb tsis paub mus kev lawm. Npauj Npaim niam mus ib pliag ces cov tubhluas los txog ntawm nws niam xubntiag. Tus tubhluas uas Npauj Npaim ntsib nram hav dej txawm hais rau nws niam tias, “Niamtais, neb yuav tuaj mus dabtsi na?”
“Cov me tub, wb yuav rov tuaj mus tom qub zog xwg os, nej tuaj mus dabtsi thiab?”
“Oh, peb yuav rov los mus tsev xwb,” tus tubhluas hais tag ces Npauj Npaim txawm hais lus hauv lub siab tias, “Lawv los mus tsev no lod?”
Npauj Npaim thiaj mam hnov nws nug ntxiv tias, “Niamtais, tus ntawm koj yog koj tus nyab los tus ntxhais na?”
“Me tub, yog kuv tus ntxhais xwb os,” Npauj Npaim niam teb tag ces tus hluas txawm nug ntxiv tias, “Niamtais, nws npe hu licas thiab puas tau muaj txiv?”
Thaum tus tubhluas nug li ntawd tag ua rau Npauj Npaim ceeb kiag ces nws thiaj tsis pub nws niam teb, nws thiaj teb ntu tias, “Kuv muaj txiv lawm ov.”
Npauj Npaim niam siab tsis kheev, nws thiaj teb rau tus tubhluas tias, “Me tub, nws hu ua Npauj Npaim no thiab tsis tau muaj txiv os.”

Npauj Npaim Txoj Kev Hlub, continues...,

Thaum nws niam hais lus tag ces tus tubhluas txawm nam kiag los ob peb ruam kev los ze rau ntawm Npauj Npaim xubntiag ua rau Npauj Npaim ciali txaj txaj muag tsis paub yuav teb licas. Tus tubhluas mam hais lus rau Npauj Npaim tias, “Nyobzoo os, Npauj Npaim.”
Npauj Npaim saib nws ua tibzoo hais lus lawm ces Npauj Npaim thiaj teb zoo zoo tias, “Nyobzoo os, leej nus. Koj lub npe hu ua licas thiab os?
“Kuv hu ua, Ntsuj Plig no,” Ntsuj Plig teb thiab ntsia ntsoov rau Npauj Npaim ob lub qhovmuag tsis ntsais muag li. Npauj Npaim los ciali saib Ntsuj Plig nruj nruj thiab xwb. Ua rau nkawd ciali nyob ntsiagto lawm ib nyuag pliag ces Npauj Npaim niam txawm hais rau nws tias, “Npauj Npaim aj…, los wb yuav mus od.”
Ntsuj Plig mam nug tias, “Npauj Npaim, koj niam neb yuav mus qhovtwg os?”
“Wb yuav rov mus ev khoom tom qub zos, Pajdawb,” Npauj Npaim teb thiab nug tias, “Ntsuj Plig, nej nyob qhovtwg tuaj os?”
Ntsuj Plig thiaj teb tias, “Peb nyob puag tim lub qab roob tsuas dawbpaug tid os hauv.”
“Es nej lub zos hu licas os,” Npauj Npaim nug ntxiv ces Ntsuj Plig thiaj teb dua tias, “Peb lub zos hu ua, “Tsua Xyuam Yaj,” os, Npauj Npaim.”
“Lod, npe zoo ua luaj,” Npauj Npaim hais tag ces nkawd ciali sib ntsia lawm ib pliag ntxiv. Npauj Npaim niam rovqab hu nws tias, “Npauj Npaim, los wb yuav mus los mas.”
Npauj Npaim mam nco dheev tias nws yuav tau mus lawm tiag. Nws thiaj hais rau Ntsuj Plig tias, “Ntsuj Plig, zoo siab tau ntsib koj hnub no tabsis thov zam kev kuv yuav tau mus lawm os.”
Ntsuj Plig thiaj hais rau Npauj Npaim tias, “Npauj Npaim, ua ntej koj yuav mus…, puas kam kuv tuav koj txhais tes ib zaug os?”
Npauj Npaim thiaj teb tias, “Wsm…, txhais tes xwb tau kawg mas, Ntsuj Plig.”
Nws txawm cev tes los rau Ntsuj Plig tuav. Thaum Ntsuj Plig tuav kiag Npauj Npaim ob sab tes, nws hnov zoo li nws lub cev sib sib hos lub plawv dhia dhia hais tsis tau ib lolus li lawm. Nkawd ciali rovqab sib ntsia nruj nruj ces ua rau Npauj Npaim niam xav tsis thoob. Nws thiaj rovqab hu Npauj Npaim tias, “Npauj Npaim aj…, los wb yuav tau mus tsam lig lawm os mog.”
“Aws, kuv mam los os, kuv niad,” Npauj Npaim teb nws niam tag ces nws thiaj lauj nws ob sab tes rovqab. Ntsuj Plig thiaj majmam tso Npauj Npaum tes thiab hais tias, “Npauj Npaim, yog li ces mus tsuag tsuag koj niam neb ho los mog.”
“Aws, ua li os, Ntsuj Plig. Cia seb puas muaj hmoo wb puas tau sibntsib lawm os mog,” Npauj Npaim hais rau Ntsuj Plig tag ces nws thiaj los nrog nws niam mus lawm.

Npauj Npaim Txoj Kev Hlub, continues...,


Tau ob peb hnub tom qab, Npauj Npaim tawm mus de zaub npuas. Thaum nws tabtom taug kev yuav mus lawm pem lawv teb pleg mus de zaub. Nws txawm seev tias, “Eb…, puas yog tias kuv nyiag nyiam Ntsuj Plig lawm ned? Uali nws puas paub tias kuv twb nyiam nws lawm thiab no ne? Kho siab ua luaj no sim hais kwvtxhiaj seb nws puas yuav hnov.”

Nijyai…, cas tawm rooj plaws yuav tsis pom tag niaj dabtsi es yuav pom tag paj hmab tawg sib cab…, yuav cab luag luj luas khaubzig nroj es hmoob txiv leej tub…e.., koj puas paub tias me nkauj xwb nim nco nco koj mog.

Nijyai…, cas tawm rooj plaws yuav tsis pom tag niaj dabtsi es yuav pom tag paj hmab tawg sib cab…, yuav cab luag luj luas khaubzig nplej es hmoob txiv leej tub…e…, koj puas paub tias me nkauj xwb nim nco nco nej mog.

Ces nim yuav chim lub laj xeeb xaus xi daim mus nplooj pos es mam mus koj mog lawv tej neeg tuaj tus ntxim nco

Npauj Npaim & Ntsuj Plig, Txojkev Hlub


Lub sij hawm Ntsuj Plig ntsia Npauj Npaim nkawd mus dhau tim hmoob zos lawm Ntsuj Plig lawv los kuj cia li ncaim kev los rau tom ntug teb thiab los mus tsev lawm. Lub sij hawm los tej tog kev Ntsuj Plig tseem nco ntsoov Npauj Npaim tus duab luag ntxhi nyob hauv nws lub siab tsis ploj thiaj ua rau Ntsuj Plig tsis tham lus dab tsi tsuas yog pheej xav txog Npauj Npaim ib leeg xwb. Lub sij hawm ntawd saum ntoo me noog puj daum dab laug quaj ntshoo nrooj ua rau nws cov phooj ywg tham lom zem xauv npos tab sis Ntsuj plig nyob ntsiag tos xwb, Ntsuj Plig ib tug phooj ywg thiaj hu tias "Ntsuj Plig...Ntsuj Plig.." ua rau Ntsuj Plig ceeb nkaus thiab teb tias "koj hais kuv los" nws tus phooj ywg teb tias "hais koj mas, puas yog koj nyiag nyiam Npauj Npaim lawm na cas tsis hais lus li lawm." Ntsuj Plig teb tias "Oh...... Cas koj twv tau zoo ua luaj na npawg, kuv tseem tab tom xav txog thaum kuv tuav Npauj Npaim 2 sab tes cas ua rau kuv cia li ua fem feeb lawm os."

Thaum ntawd Ntsuj Plig thiaj hais rau nws cov phooj ywg tias "nej tsis xav li cas no cia kuv hais kwv txhiaj peb mloog nawb." Lawv los kuj teb tias "peb paub koj kho siab lawm ces hais los tau mas Ntsuj Plig," Ntsuj Plig thiaj hais ib zaj kwv txhiaj tias:

Nian yes...... Niaj coob tsa suab nqhoob coob caus yaum tuaj tsa suab nqho plees nkauj nraum nyob ntuj txoog txoj kev deb ua luaj no ntshe yuav ceeb laj ua cas nco

Nian yes...... Niaj coob tsa suab nqhoob coob caus yaum tuaj tsa suab nqua plees nkauj nraum nyob ntuj txoog txoj kev deb ua luaj no ntshe yuav ceeb laj ua cas tshua

Nyuj coob nog toj roob coob ncuas nog toj taim toj roob khaub xib nco koj ua luaj no puas yuav muaj hnub rov tau ntsib

Nyuj coob nog toj roob coob ncuas nog toj taim toj roob huab ncua nco koj ua luaj no puas yuav muaj hnub tau rov sib cuag dua.

Thaum Ntsuj Plig tab tom hais kwv txhiaj tsis tau xaus nws ib tug phooj ywg txawm cia li hu tias"Ntsuj Plig...... koj vwm rau Npaum Npaim lawm tiag sad" ces Ntsuj Plig thiaj tsis xaus nws zaj kwv txhiaj thiab lawv txawm cia li sib cav txog npauj npaim lawm. Lub caij tav su dua lawv los txog tsev cov phooj ywg nias mus nyias tas lawm Ntsuj Plig los zaum ib pob xav txog Npauj Npaim, yim xav yim pom Npauj Npaim tus duab tsis ploj hauv nws lub siab ua rau Ntsuj plig haj yam nco Npauj Npaim thiab xav ntsib nws heev.


Tus sau yog, "Ntsuj Plig"

Npauj Npaim Txoj Kev Hlub, continues...,


Npauj Npaim los nyob tau ob peb hnub hauv tsev tsis ntsib thiab tsis pom Ntsuj Plig tuaj tshwm rau qhovtwg li lawm. Npauj Npaim thiaj tawm mus ncig taug kev uasi yuav mus lawm tim ntug dej. Thaum nws tabtom mus nws txwm xav tau tias, "Ab..., cas tau ob peb hnub no tsis pom Ntsuj Plig tuaj ze tej chaw no li ntshe nws yog neeg muaj tswv lawm hod? Ua cas zoo li kuv ciali nco nco nws lawm ne? Wsm..., tejzaum ntshe nws twb yog neeg muaj tswv lawm es ntsib yus lam nrog yus tso dag xwb hod."

Npauj Npaim tseem tom xav xwb tsis nco qab mus kev lawm ces muaj ibtug tubhluas lawv nws qab tuaj mus tim ntug dej thiab. Tus tubhluas ntawd tuaj txog ze ntawm Npauj Npaim ces zoo li Npauj Npaim tsis ncoqab mus kev lawm. Nws txawm hu kiag tias, "Nyobzoo os, leej muam. Koj tabtom xav txog leejtwg los yog koj mob taubhau os?"
Npauj Npaim thiaj tig loo los saib no ua cas ho yog Ntsuj Plig tiag. Nws thiaj hu tias, "Nyobzoo os, leej nus. Koj puas yog Ntsuj Plig ne?"
"Aws, kuv yog mas. Es koj ne, puas yog Npauj Npaim thiab ma?"
"Aws, kuv yog Npauj Npaim os," Npauj Npaim teb thiab dauv nws ob lub qhovmuag vim nws txaj muag thiab ho tsis ntseeg tias vim licas nws tseem tabtom xav txog Ntsuj Plig xwb es Ntsuj Plig ho tuaj txog ntawd lawm thiab. Ua rau nws zoo siab thiab ho txaj muag thiab. Ntsuj Plig thiaj nug tias, " Npauj Npaim, koj yuav mus lawm qhovtwg os?"
"Kuv yuav mus da dej xwb. Uali koj ned, yuav mus lawm qhovtwg thiab os?"
Ntsuj Plig teb tias, "Twb yog hnub no ntxov ntxov kuv siab es kuv tuaj mus ncig uasi los txog nov xwb os."
"Aud," Npauj Npaim teb thiab tsis paub hais lus ntxiv lawm. Ntsuj Plig thiaj nug Npauj Npaim tias, "Npauj Npaim, uali puas kam kuv nrog koj mus da dej thiab os?"
Npauj Npaim tig los saib Ntsuj Plig ib muag thiab tig mus saib rau ib ncig ntawm qhov chaw nkawd sawv ntawd tsis muaj neeg pom li tsuas yog nkawd ob leeg xwb. Npauj Npaim txawm teb tias, "Tau kawg mas, Ntsuj Plig."
"Yog tau no puas kam nyob ntawm no tos kuv mus tim tsev mus nqa kuv cov khaubncaws tso ma?" Ntsuj Plig nug Npauj Npaim. Npauj Npaim thiaj teb tias, "Aws, koj kavtsij mus nqa khaubncaws koj mam tuaj es kuv ua ntej mus tim peb teb zaub lawm."
Ntsuj Plig thiaj nug tias, "Es nej daim teb zaub nyob rau qhovtwg no? Tsam kuv tuaj nrhiav tsis tau koj lawm ned."
"Tau kawg los mas, kuv mam nyob tim teb zaub tos koj tuaj txog wb mam da dej los yeej tau kawg. Peb daim teb zaub ces yog daim nyob sab xis tim pas dej loj uas cov neeg tuaj da da dej xwb," Npauj Npaim hais rau Ntsuj Plig tag ces Ntsuj Plig thiaj hais ntxiv tias, "Yog li ces tsis txhob dag kuv nawd. Kuv mus nqa khaubncaws tso mam tuaj ntsib koj tim pas dej nawd. Tos kuv tuaj txog tso wb mam da dej uake nawd."
"Aws, uali os, Ntsuj Plig," Npauj Npaim teb rau Ntsuj Plig tag ces Ntsuj Pig thiaj khiav khiav los mus tsev lawm.

Npauj Npaim & Ntsuj Plig, Txojkev Hlub


Tom qab Ntsuj Plig thiab Npauj Npaim nkawd tau da dej tas yuav rov los mus tsev Ntsuj Plig thiaj nug tias "Npauj Npaim tag kis koj yuav mus sab tsi?" Npauj Npaim teb tias "Tag kis kuv yuav nrog Maiv Paj mus dob nplej xwb." Ntsuj Plig hais ntxiv tias "Yog li puas kam kuv nrog neb mus thiab ma?" Npauj Npaim los kuj teb tias tau kawg mas Ntsuj Plig, ntshe koj tsis kam mus xwb laud." Ces nkawd txawm cia li rov los tsev lawm.

Hnub tom qab kaj ntug noj tshais tas Npauj Npaim thiab Maiv Paj nkawd ntim su mus txog tom tog tsev no ua cas Ntsuj Plig thiab Tub nkawd twb nyob tod tos nkawd lawm. Lawv thiaj li mus ua teb ua ke ib hnub, hnub ntawd Ntsuj Plig thiab Npauj Npaimn kawd tau tham txhua yam txaus nkaus. Lub sij tav su tshav los kub heev lawv ua teb nto ib ntsus Npauj Npaim thiaj hais rau Maiv Paj tias "Maiv Paj peb so ib pliag tso os lod" Maiv Paj los kuj teb tias "Npauj Npaim tshav kub heev li peb mus zaum pem cov hav qos ntoo ped ib pliag tso mas."

Lub sij hawm lawv mus so, Ntsuj Plig thiab Npauj Npaim nkawd txawm mus zaum ua ke 2 leeg rau ib qho hos Tub thiab Maiv paj nkawd txawm mus zaum rau tom ib sab lawm. Ntsuj Plig thiaj tau hais rau Npauj Npaim tias "Npauj Npaim..... Wb tham ib hnub tav no lawm koj puas txaus siab yuav kuv tiag los yog tshuav dab tsi khuam siab no txawm hais kiag los seb?". Npauj Npaim teb tias.... "Ntsuj Plig .... tsis muaj dab tsi khuam siab lawm tsuas yog kuv xav tias twb tshuav 3 lub hlis lawm xwb twb yuav noj peb caug, kuv xav nrog koj pov ib xyoos pob ua ke xwb vim hnov tias nej sab teb chaws no koj txawj kwv txhiaj heev li. Kuv tseem xav hnov koj hais kwv txhiaj xwb na...Ntsuj Plig."

Ntsuj Plig los kuj teb zoo tias "Npauj Npaim... Yog li txog thaum ntawd koj puas kam nrog kuv mus tiag mas?" Npauj Npaim teb tias "Ntsuj Plig.... Tsuav kuv tau nrog koj pov 3 hnub pob xwb ces kuv txaus siab nrog koj mus pib wb lub neej lawm los mas." Ntsuj Plig thiaj hais ntxiv tias "Npauj Npaim....Yog li koj puas kam txais kuv ib qho dab tsi no?" Npauj Npaim teb tias "Dab tsi ma" Ntsuj Plig hais ntxiv tias "Txawm yog dab tsi los xij mas tsuav yog kuv muab xwb". Npauj Npaim xav zoj ib pliag thiaj teb tias "Tau kawg mas Ntsuj Plig," Ntsuj Plig thiaj thau tau ib nti nplhaib coj los tso looj rau Npauj Npaim tus ntiv tes thiab hais rau Npauj Npaim tias "Npauj Npaim ... txawm tsis yog ib qho khoom muaj nqis li koj xav los thov cia muab ua pov thawj tias txij no mus koj yog kuv tug lawm no nawb." Npauj Npaim los kuj teb tias "Ntsuj Plig.....Koj lam hais dag los hais tiag na?" Ntsuj Plig hais ntxiv tias "Npauj Npaim.... Kuv hlub koj thiab kuv xav tias muaj ib hnub lub nplhaib no yuav tig los ua ib lub pov haum zoo rau kuv os mog." Npauj Npaim los kuj teb tias "Ntsuj Plig... Yam twg yog koj xav tau lawm yeej tsis muaj lwm yam yuav thaiv tau koj txoj hau kev mas."

Hnub ntawd tom qab Npauj Npaim thiab Ntsuj Plig nkawd sib tham txaus lawv thiaj tau nqis los nram tsev teb thiab los ua su noj. Hnub ntawd tshav ntuj nrig lub ntuj tsis muaj ib qho huab, Ntsuj Plig xav tias nws yog ib hnub zoo heev rau Npauj Npaim nkawd txoj kev sib ntsib hos Npauj Npaim los kuj xav tias yog ib txoj hmoo zoo uas tau ntsib Ntsuj Plig rau hnub no. Thaum lawv noj mov tag lawv kuj rov mus ua teb thiab thaum tsaus ntuj lawv kuj ua ke rov los mus tsev. Ntsuj Plig kuj pab ev Npauj Npaim lub kawm los yuav txog zos mam txo rau Npauj Npaim ev lawm. Ntsuj Plig ntsia Npauj Npaim zoo tam li lub paj tawg tshiab tsis muaj hnub yuav zaus, hos Npauj Npaim los ntsia Ntsuj Plig zoo nraug ntxiag xav tias yuav tsis txawj laus.

Tus sau yog, "Ntsuj Plig"

Npauj Npaim Txoj Kev Hlub, continues...,


Npauj Npaim tuaj mus nyob tim teb zaub tos thaum Ntsuj Plig tuaj txog ces nkawd mam mus da dej. Lub sijhawm no Npauj Npaim txawm xav tau tias, “Ab…, cas ib sijhuam xwb kuv ciali lees tias yuav nrog Ntsuj Plig da dej uake no. Yog nws dag ces kuv yuav nkim zog tos. Hos yog tias nws tuaj tiag no kuv ho yuav da dej nrog nws tau licas no? “

Npauj Npaim tseem tabtom xav li ntawd xwb ua cas Ntsuj Plig txawm siv tuaj txog lawm. Ntsuj Plig hu kiag tias, Npauj Npaim, koj puas tseem tos kuv lawm mas lod?”
Npauj Npaim tig loo los saib thiab luag ntxhi rau Ntsuj Plig. Nws teb Ntsuj Plig tias, “Wsm…, kuv tseem tos mas, koj twb tuaj lawm lod?”
“Aws, ua tsaug koj tseem tos kuv thiab nawd,” Ntsuj Plig hais.
“Aws, ua tsaug koj tuaj ua kuv luag thiab nawd,” Npauj Npaim hais tag ces nkawd txawm nqes mus rau hauv dej lawm. Thaum mus txog hauv ntug dej, Ntsuj Plig hais rau Npauj Npaim tias, “Npauj Npaim, kuv thov koj ib yam dabtsi puas tau os?”
“Wsm…, tau mas, Ntsuj Plig,” Npauj Npaim teb luag ntxhi xwb.
“Kuv thov koj pab ntxua kuv ob cev khaubncaws no puas tau os?”
Npauj Npaim teb ntua tias, “Aws…, tau mas, Ntsuj Plig.”