HMOOB NTUJ TSHIAB

TXOJ KEV HLUB FORUM

October 2018

SunMonTueWedThuFriSat
 123456
78910111213
14151617181920
21222324252627
28293031   

Calendar Calendar

Top posters

Npauj Npaim (1385)
 
Ntsuj_Plig (609)
 
Lubpajzoo (455)
 
Tubzoonraug (408)
 
Dok_Champa (368)
 
maivntximhlub (349)
 
NkaujNyiag (101)
 
PajHmabPajNtoos (96)
 
Tojxeem (94)
 
Nkauj_Hli (88)
 

Latest topics

» Xa Xov Rau Qub Phooj Ywg
Thu Dec 28, 2017 12:11 am by Ntsuj_Plig

» Nco Hauv Lub Tsev Pheeb Suab
Thu Oct 26, 2017 9:38 pm by Ntsuj_Plig

» Nkauj Ntxoo Mus Tsheej Dab
Wed Jul 19, 2017 10:34 pm by Ntsuj_Plig

» Sib ntsib tom qab 25 xyoos tau sib ncaim
Wed Jul 19, 2017 10:32 pm by Ntsuj_Plig

» Txoj Kev Hlub
Sun Feb 26, 2017 4:34 pm by Ntsuj_Plig

» NCO KUV LUB QUB ZOG - THAVIENG
Mon Jan 09, 2017 8:02 am by Ntsuj_Plig

» Paj Huab & Yim Laj Lub neej hluas
Mon Oct 24, 2016 7:53 pm by Ntsuj_Plig

» Soob NTxawg Thoj Cov Lus Tham
Fri Sep 09, 2016 12:01 am by Ntsuj_Plig

» Lub neej zoo tam li dej ntws
Sat May 21, 2016 1:23 pm by Ntsuj_Plig

Who is online?

In total there is 1 user online :: 0 Registered, 0 Hidden and 1 Guest

None


Most users ever online was 80 on Sat Jun 30, 2012 10:41 pm

Statistics

Our users have posted a total of 4114 messages in 218 subjects

We have 36 registered users

The newest registered user is cwj mem hmoob

Keywords

Gallery


Log in

I forgot my password


    Xa Xov Rau Qub Phooj Ywg

    Share
    avatar
    Ntsuj_Plig
    Moderator

    Posts : 609
    Join date : 2011-02-15

    Xa Xov Rau Qub Phooj Ywg

    Post by Ntsuj_Plig on Thu Dec 28, 2017 12:11 am

    TITLE: XA XOV RAU QUB PHOOJ YWG

    Ib tsoom mi phooj ywg cas lub sij hawm yuav khiav ceev npaum noog muaj tis ya. Yog tsis saib ces zoo li ib pliag xwb hos yog ua zoo saib cas twb dhau los lawm 37 lub xyoo ntawm peb txoj mi kev hluas uas tau los ua ib lub neej nyob ib vuag rau hauv ib lub hav zoov nuj txeeg. Ntsia mus rau tom hauv ntej zoo li txoj kev twb yuav tws, tig saib rov tom qab cas twb los lawm ib ncua kev deb kawg nkaus uas tsia pom ploj loog hauv lub neej lawm xwb.
    Koj puas tseem nco tau lub caij peb sawv daws los nyob ua ke ib vuag rau ib lub zoov nuj txeeg. Thaum los pib luaj teb hauv tej xub zoov nraj yij hos huam rheeb nplooj zeeg tshaws. Sawv ntxov tsees suab cuam kaus laws pem tej roob ua hav zoo kaj nrig kho siab zim, ntawd yog peb lub neej los nyob ib vuag rau hauv ib lub plawv zoov nuj txeeg tiag cas nim no lub zoov nuj txeeg ntawd ho dhau mus ua dab tsov tej chaw nyob lawm xwb.

    37 xyoo dhau mus lawm muaj ntau yam nyob hauv lub hlwb tseem tsis tau ploj. Kuv tseem nco tau cov mi nyuam tub thiab mi nyuam ntxhais lub caij ntawd ua zuj zoog rau nruab siab zoo tam li ua yog toog rau nruab dab ntub npau suav tas li. Lub caij ntawd koj tseem me kuv los kuj tseem hluas tus twg los cev yiag txias tawm rooj plaws suab kwv txhiaj ntas ntua. Cas ib sij huam koj laus tas tshuav nrig cwj kuv laus dua tshuav nrig pas lawm xwb tiag. Ob tug mi nyuam tub thiab mi nyuam ntxhais ntawd ho mus dua lawm lawm os.

    Kuv tseem nco tau lub caij sawv daws tab tom xa khoom los mus rau nruab liaj nruab teb. Muaj ntau zaus tau ntsib thiab tau pom tej neeg tshiab uas yus ib txwm tsis tau pom dua tej tog kev tas li. Muaj ib zaug kuv thiab peb 2-3 tug phooj ywg tab tom xa nra tuaj rau ntawm teb thiaj tau ntsib ib nkawm niam txiv nrog rau ib tug mi nyuam ntxhais hnub nyoog muaj li 14 xyoos tab tom xa nra tuaj mus thiab. Peb sib caum tau ntawm ib ncua kev nyob hauv hav zoov ntsia tus mi nyuam ntxhais ntawd tib tug mi cev yiag txias soob xais ua rau kuv cia li muab nws nyiag nyiam ib pliag lawm ntag, tab sis thaum ntawd kuv cov phooj ywg peb lost seem hluas hos nws los tseem me kuj tsis tau nrog nws tham vim nws niam thiab nws txiv los kuj nrog nraim nws thiab.

    Dhau los ntau hnub txoj kev rov mus rau nram qub zog kuj nphob zuj zus vim sawv daws twb xa khoom los tas zuj zus lawm. Tej mi vaj tse tau muab tso pov tseg rau poj ntxoog ua lub chaw seev lawm xwb tiag. Txij ntawd los peb txawm los luaj teb thiab npaj los ua zej ua zos nyob. Ib pliag ntshi muab zoov nuj txeeg ntov tag ua rau tej mi liab mi cuam yuav tsum tau tshais chaw khiav mus nyob rau lwm lub zoov, zoo tam ntua li peb txoj kev tsiv teb tsaws chaw thiab ntag. Lub caij luaj teb hlawv tas pib muab tej noob qoob nrom nroos rau nruab teb, ib pliag ntshi mi nplej thiab pob kws ntsuab kaim zaj zees ntaus cua ntxiag mus puv toj. Thaum ntawd tig rov xav txog koj tus mi qub hluas nraug thiab kuv tus mi qub hluas nkauj uas muab tso tseg rau tom qub zog mas nco thiab kho siab tshaj li tiag.

    Tsis ntev sawv daws los ua tau vaj tau tsev muaj zej muaj zos thaum ntawd yog peb cov mi tub hluas txoj kev mus yos. Tsaus ntuj zuag noj hmo tas nrho npaj teeb zoj zeeg thiab sib yaum daws mus saib hmoob tej ntxhais. Ntuj tsaus ntais dev tom tsij qees cuag dev pom dab hnov suab raj nplaim nrov laus ntxhawv tim tej ncauj ke tuaj, ntawd yog peb txog kev hluas ib vuag dua lawm xwb tiag ib tsoom me phooj ywg. Ib pliag ntshis tej ntxhais noj hmo tas nrho ntxuav taw zoj zeeg muab txhuv tsau kiag thiab maj nrawm nroos los pw. Thaum ntawd txawm pib hnov lub suab ncas thiab suab ntxhi nrov sib txuam daws. Ntuj teb tag hmo hnub qub dawb vog ntsia rau tom tej ncauj ke qaim hli nrig ntxim tej tus mi nyuam poj ntxoog ua yuj yees taug kev los, tab sis hauv lub siab tseem nyob tau kaj nrig vim koj tseem tuav rawv kuv txhais tes cia.
    Muaj ntau zaus lub caij ua liaj ua teb, peb ib tsoom phooj ywg kuj mus saib hmoob tej ntxhais ua teb. Ib txhia nrog tham ib txhia kuj pab ua teb lom zem xauv npos. Tom qab peb tau los nyob ua ke tsis ntev ua rau peb tsoom phooj ywg kuj tau paub tej mi hluas nkauj nyob deb nyob ze zuj zus. Muaj ntaus zaus peb tau mus tham hluas nkauj ntawm ib lub zos nyob ze rau ntawm peb zos. Nyob hauv lawv lub zos ntawd kuj muaj li 4 - 5 tug ntxhais tab sis muaj ib tug muaj hnub nyoog li 17 xyoo hos dua li cov yau lawv tsuas yog li 14 rau 15 xyoos xwb. Lub sij hawm ntawd kuv txawm mus tham tau tus loj uas muaj 17 xyoo ntawd nws kuj tsis loj tsis siab tab sis nws zoo tau xis neeg hais lus luag ntxhi. Txij ntawd los ua rau nws thiab kuv txawm tau los sib paub ua phooj ywg tau ib ncua sij hawm li 2 - 3 lub hlis.

    Muaj ib hnub nyob ze rau ntawm peb zos txawm muaj ib lub ntees tuag, peb kuj sib yaum mus sib pab txua txiag muab tus neeg laus ntawm faus. Lub sij hawm ib txhia tab tom phua txiag thiab ib txhia kuj so nyob tos thaum ib co sab lawm los ib co mam ho hloov. Kuv tseem tab tom nyob saum ib ya cav ntsia lawv cov uas tseem tab tom phua ntoo ntawd. Txawm muaj ib lub suab hu tuav nkaus kuv npe, kuv tig hlo los saib cas yog ib tug tub hluas uas kuv tsis tau pom dua. Nws txawm hais ntxiv tias koj puas yog tus kuv paub thiab hais kiag kuv lub npe dua ib zaug ntxiv, kuv thiaj teb tias yog mas ua cas koj ho paub kuv. Nws txawm teb tias kuv paub koj thaum peb kawm ntawv ua ke nyob Moos Cab lawm, kuv xav tag nrho kuv cov phooj ywg cas kuv ho tsis paub nws. Kuv thiaj hais rau nws tias cas kuv ho tsis tau paub koj dua ne. Nws thiaj teb tias, peb yog cov mi nyuam hmoob uas tuaj kawm ntawv nyob ntawm nej tog tsev. Thaum ntawd kuv mam nco tau pab tub hluas ntawd tias lub sij hawm kuv mus kawm ntawv ntawd kuv tau mus nrog ib yim kwv tij nyob xwb tab sis muaj ib pab tub hluas lawv tuaj yuav tau ib lub me nyuam tsev nyob rau ntawm peb tog tsev tiag. Tab sis lub caij ntawd lawv yeej loj dua kuv thiab tsis paub tias lawv kawm ntawv ntawm Moos Cab los xyov yog lawv kawm nyob rau Liaj Qhua.

    Txij ntawd los nws txawm tuaj ua phooj ywg rau kuv thiab pheej tuaj saib kuv vim peb pab kwv tij ntawd peb yeej muaj li 4-5 tug tub hluas thiab. Hos ntawm nws ces nws cov tij laug twb khiav mus rau thaib teb tas lawm lawv lub zos kuj muaj 3-4 tug ntxhais zoo nkauj kawg tab sis cov tub ces tshuav nws lawm xwb. Nws tsis muaj khub, thaum nws paub kuv lawm nws yeej pheej tuaj nrog peb ua si. Thaum pib kuv xav tias tej zaum yog nws xav tuaj tham peb cov muam ntawm peb zos nws thiaj xav tuaj ua phooj ywg kom tau chaw pw xwb, vim ntawm peb zos mus rau tom lawv zos ncua kev deb li 1 xuab moos tawm. Tab sis thaum nws tuaj ntau zaus kuv kom nws mus nrog peb cov muam ua si los nws kuj tsis mus thiab, muaj ib hmos kuv thiaj hais rau nws tias hmo no kuv coj koj peb mus tham hluas nkauj. Nws hais rau kuv tias yuav mus qhov twg, kuv teb tias muaj ib lub zos nyob tsis deb ntawm peb no muaj 3 - 4 tug me nyuam hluas nkauj thiab. Hmo ntawd kuv thiab peb 2-3 tug phooj ywg txawm coj nws mus ua si, thaum mus txog nram tus hluas nkauj kuv tham lawm kuv thiaj mus hu tau nws teb wb tham 2-3 los ces kuv txawm hais rau nws tias koj nrog kuv tus phooj ywg tham ib pliag. Thaum ntawd kuv cia nkawd sib tham kuv txawm mloog cas ib ntsis zoo li nkawd tham li nkawd yeej sib paub lawm. Thaum peb ua si txaus ib tag hmo lawm peb tig rov qab los, nws thiaj hais rau kuv tias npawg tus hluas nkauj ntawd yog kus tus. Wb ib txwm sib paub thaum me me nyob ua ke tim qub zog los lawm, tab sis sib ncaim los tsis paub tias lawv los nyob ntawm no. Txij ntawd los, kuv thiaj ua siab muab tus hluas nkauj no tso tseg rov rau nws. 
    Kuv tseem nco tau muaj ib hmos nyob hauv ib lub mi nyuam tsev pheeb suab nyob rau ib thaj qub teb pob kws. Thaum kuv tuaj txog ntua cas pom koj thiab ib tug tub hluas ib leeg zaum ntawm ib sab qhov cub sib tham nywb nyes rauv taws cig ntsaj thuav. Thaum koj pom dheev kuv tuaj koj txawm hu tias “ Koj tuaj lawm los, los zaum os” lub caij ntawd kuv los tseem hluas thiab kuj nyiam hais lus tso dag thiaj teb koj tias “ Aws, zoo li no yuav zaum qhov twg na?” Koj txawm sawv tsees mus dam kiag tau ib lub ntsis nplooj tsawb pua kiag ntawm koj ib sab thiab hais ntxiv tias “ Zaum ntawm kuv ib sab no mas, kuv yeej tsis lo koj li os.” Thaum ntawd kuv saib cas koj yuav ntxim hlub ua luaj hais lus tau luag nyav. Kuv los txawm tsis xav dab tsi txog koj tus mi hluas nraug li kuv cia li teb tias “ Zaum ces xav kom lo kiag hos” thiab kuv txawm zaum ntua ntawm koj ib sab.

    Lub caij ntawd kuv saib koj lub mi ntsej muag luag nyav zoo tau ntxim hlub kawg li. Peb txawm pib sib tham ib leeg ob – peb los koj cia li pib taij kom kuv hais kwv txhiaj. Kuv teb koj tias nyob hauv hav zoov nuj txeeg hais tsis tau kwv txhiaj na no los koj tsis tseev li thaum kawg kuv thiaj tau hais tas ib txoj kwv txhiaj thiab koj los kuj hais tas ib txoj thiab. Kuv thiaj cheem koj tias cias peb tham lawm xwb txhob hais kwv txhiaj lawm tsaus ntuj nti li no tsis tau luag. Wb thiaj cia li tsum, thiab peb txawm sib tham tso daj tso luag ua si ib leeg ob – peb los. Koj txawm cia li muab tus tub hluas ntawd ntiab mus tsev, thaum pib nws kuj teb tias nkawd twb tseem nyob ces kuv nyob ib pliag kuv mam mus. Ib pliag ntxiv koj rov hais dua, kuv saib zoo li nws npau taw zog lawm nws teb koj tias cas koj kom kuv mus koj ho tsis hais kom nkawd mus ma. Thaum ntawd koj txawm cia li teb nws tias koj nyob ze thiab koj muaj phom koj tau luag ces koj mus hos nkawd nyob deb tuaj cia nkawd pw ntawm no ua peb luag. Kuv saib nws chim kiag lawm nws thiaj ua siab sawv mus lawm. Koj puas nco qab tias thaum koj hais li ntawd rau nws zoo ib yam nkaus li koj tab tom muab ib tug pos kaus ntsaj hno kiag nws nplooj siab mob tshab plaws nraum nruab qaum.

    Thaum nws dhau lawm koj txawm hais rau kuv tias hmo no neb ua wb luag pw ntawm no nawb, kuv los txawm teb dag ntsuav tias yuav pw qhov twg no? Kuv saib koj mus muab koj tus mi nyuam niam hluas txav zog rau tim ntug thiab kho chaw tsuag tsuag koj txawm hais rau kuv tias “Koj pw ntawm kuv nruab qaum es koj tus phooj ywg pw tom koj nruab qaum xwb mas.” Cas thaum ntawd kuv saib koj yuav ntxim hlub thiab siab zoo ua luaj. Kuv thov txim uas hmo ntawd kuv ua tsis tau li koj lo lus thov, kuv thiaj ua siab coj kuv tus phooj ywg wb mus pw rau lwm qhov lawm. Qhov tseeb tiag kuv xav tias koj yog kuv tus phooj ywg tus hluas nkauj, kuv yeej tsis muaj ib nplooj siab yuav rhuav tshem neb txoj kev sib thiab kuv xav tias muaj ib hnub neb yuav sib sau mus ua ib lub neej kom peb tau txoj kev sib ntoj sib thuv. Vim txoj kev xav zoo ntawm kuv, kuv thiaj tsis kam ua neb luag pw hmo ntawd. Tab sis txawm yog tias kuv yuav ua zoo npaum cas rau koj los kuv yeej pab tsis tau txoj kev chim uas koj tau muab tus pos kaus ntsaj chob koj tus mi phooj ywg hmo ntawd lub siab. Kuv tsis to taub tias vim dab tsi thiaj ua rau koj hloov siab rov mus yuav nws rau nws muab koj tsim pauj txoj kev ntsim siab hmo ntawd. Hnub no kuv thiaj xav hais rau tus neeg uas twb tau koj lawm thov kom nws hlub hlub koj mu sib txhis kom tsim nyog nws txoj kev ntxias dag koj mus yuav nws thiab tso koj tus hluas nraug tseg.

    Ib sij huam lub caij nyoog dhau mus li 2 lub hlis tom qab kuv txawm hnov tias koj mus yuav tus tub hluas uas hmo ntawd koj muab nws ntiab mus tsev lawm. Ntuj nis mi nkauj hmoob cas koj lub siab yuav muag ua luaj. Tsis nco tias koj twb muab nws nplooj siab hno tshab plaws ua rau nws tuag tsis taus, zaum no nws thiaj ua zaj ua ntxeev ntxias dag kom tau koj rov mus tsim pauj txoj kev chim xwb. Tom qab 3 lub hlis uas koj tau mus yuav nws lawm kuv hnov tias nws tau mus yuav nws tus qub hluas nkauj los ua neb tus niam yau thiab txij ntawd los nws cia li tsis hlub koj zuj zus. Tsis ntev ntawd nws txawm cia li muab koj coj khiav mus kom deb ntawm koj niam thiab koj txiv lawv lawm. Txij ntawd los tsis paub tias koj lub neej tshav ntuj los pos huab li lawm.

    Tom qab tsis ntev ntawd kuv los kuj ua siab yuav poj niam thiab wb txawm cia li tsiv tuaj mus rau thaib teb lawm. Kuv pab tu siab ntau tias kuv twb txaus siab hlo muab koj tso rov mus rau koj tus qub hluas nraug los cas thaum kawg neb ho tseem tsis sib tau thiab.

    Kawg no, vam thiab cia siab tias peb ib tsoom phooj ywg uas tau nyob ua ke ib vuag yuav nco qab txog lub sij hawm no thiab.

    Ua tsaug ntau

    ©SKM - 2017







    bird love Pictures, Images and Photos

    "Koj xwb thiaj yog tus kuv hlub"

      Current date/time is Sun Oct 21, 2018 6:16 am