HMOOB NTUJ TSHIAB

Would you like to react to this message? Create an account in a few clicks or log in to continue.
HMOOB NTUJ TSHIAB

TXOJ KEV HLUB FORUM

March 2024

SunMonTueWedThuFriSat
     12
3456789
10111213141516
17181920212223
24252627282930
31      

Calendar Calendar

Top posters

Npauj Npaim (1363)
Roob Cuam Kau Lub Neej Ib Vuag Dua Bar_leftRoob Cuam Kau Lub Neej Ib Vuag Dua BarRoob Cuam Kau Lub Neej Ib Vuag Dua Bar_right 
Ntsuj_Plig (560)
Roob Cuam Kau Lub Neej Ib Vuag Dua Bar_leftRoob Cuam Kau Lub Neej Ib Vuag Dua BarRoob Cuam Kau Lub Neej Ib Vuag Dua Bar_right 
Lubpajzoo (449)
Roob Cuam Kau Lub Neej Ib Vuag Dua Bar_leftRoob Cuam Kau Lub Neej Ib Vuag Dua BarRoob Cuam Kau Lub Neej Ib Vuag Dua Bar_right 
Tubzoonraug (409)
Roob Cuam Kau Lub Neej Ib Vuag Dua Bar_leftRoob Cuam Kau Lub Neej Ib Vuag Dua BarRoob Cuam Kau Lub Neej Ib Vuag Dua Bar_right 
Dok_Champa (367)
Roob Cuam Kau Lub Neej Ib Vuag Dua Bar_leftRoob Cuam Kau Lub Neej Ib Vuag Dua BarRoob Cuam Kau Lub Neej Ib Vuag Dua Bar_right 
maivntximhlub (351)
Roob Cuam Kau Lub Neej Ib Vuag Dua Bar_leftRoob Cuam Kau Lub Neej Ib Vuag Dua BarRoob Cuam Kau Lub Neej Ib Vuag Dua Bar_right 
NkaujNyiag (101)
Roob Cuam Kau Lub Neej Ib Vuag Dua Bar_leftRoob Cuam Kau Lub Neej Ib Vuag Dua BarRoob Cuam Kau Lub Neej Ib Vuag Dua Bar_right 
Tojxeem (93)
Roob Cuam Kau Lub Neej Ib Vuag Dua Bar_leftRoob Cuam Kau Lub Neej Ib Vuag Dua BarRoob Cuam Kau Lub Neej Ib Vuag Dua Bar_right 
PajHmabPajNtoos (90)
Roob Cuam Kau Lub Neej Ib Vuag Dua Bar_leftRoob Cuam Kau Lub Neej Ib Vuag Dua BarRoob Cuam Kau Lub Neej Ib Vuag Dua Bar_right 
Nkauj_Hli (88)
Roob Cuam Kau Lub Neej Ib Vuag Dua Bar_leftRoob Cuam Kau Lub Neej Ib Vuag Dua BarRoob Cuam Kau Lub Neej Ib Vuag Dua Bar_right 

Latest topics

» LEEJ NIAM HNUB 2020
Roob Cuam Kau Lub Neej Ib Vuag Dua EmptyMon Feb 01, 2021 9:48 am by maivntximhlub

» Nyiaj Txiag Pauv Tsis Tau Kev Hlub
Roob Cuam Kau Lub Neej Ib Vuag Dua EmptySat May 09, 2020 8:15 pm by Ntsuj_Plig

» Caw Npauj Npaim rov tuaj qhia qee yam
Roob Cuam Kau Lub Neej Ib Vuag Dua EmptyMon Apr 20, 2020 8:43 am by Tubzoonraug

» Nej leej twg Paub LorMong Lo
Roob Cuam Kau Lub Neej Ib Vuag Dua EmptyMon Apr 20, 2020 8:24 am by Tubzoonraug

» Nyob zoo phooj ywg
Roob Cuam Kau Lub Neej Ib Vuag Dua EmptyTue Jun 04, 2019 6:01 am by maivntximhlub

» GVP thiab Hmoob txoj kev ua rog nyob nplog teb
Roob Cuam Kau Lub Neej Ib Vuag Dua EmptySun Mar 10, 2019 9:53 pm by Ntsuj_Plig

» Xa Xov Rau Qub Phooj Ywg
Roob Cuam Kau Lub Neej Ib Vuag Dua EmptyThu Dec 28, 2017 12:11 am by Ntsuj_Plig

» Nco Hauv Lub Tsev Pheeb Suab
Roob Cuam Kau Lub Neej Ib Vuag Dua EmptyThu Oct 26, 2017 9:38 pm by Ntsuj_Plig

» Nkauj Ntxoo Mus Tsheej Dab
Roob Cuam Kau Lub Neej Ib Vuag Dua EmptyWed Jul 19, 2017 10:34 pm by Ntsuj_Plig

Who is online?

In total there are 3 users online :: 0 Registered, 0 Hidden and 3 Guests

None


Most users ever online was 203 on Sun Jul 04, 2021 2:20 pm

Statistics

Our users have posted a total of 4024 messages in 216 subjects

We have 36 registered users

The newest registered user is cwj mem hmoob

Keywords

Gallery


Roob Cuam Kau Lub Neej Ib Vuag Dua Empty

Log in

I forgot my password


    Roob Cuam Kau Lub Neej Ib Vuag Dua

    Ntsuj_Plig
    Ntsuj_Plig
    Moderator


    Posts : 560
    Join date : 2011-02-15

    Roob Cuam Kau Lub Neej Ib Vuag Dua Empty Roob Cuam Kau Lub Neej Ib Vuag Dua

    Post by Ntsuj_Plig Sun Apr 03, 2016 10:58 pm

    ROOB CUAM KAU LUB NEEJ IB VUAG DUA

    Yog Yim Laj, Paj Huab thiab Nkauj Ntxoo 
    Lawv lub neej txoj kev nkauj nraug nyob tsis ploj hauv nruab siab mus ib txhis


    Xyoo 1979 tom qab tsoom Hmoob tau swb kob rog Cob Fab nyob tuam laj Roob Phus Npiab rau nplog liab thiab nyab laj qaum teb. Ib feem ntawm cov Hmoob uas nyob raws sab taw roob Phus Npiab sab hnub tuaj xws li: Naj Loog, Nab Fias, KHaub Xib, Phab Luj Muas Oo, mus rau Dej Taug thiab Thas Xes uas nyob ze rau ntawm taw roob Xam Leej thiaj tau tsiv los mus nyob rau nroog Thoj Vias (Thavieng).

    Tom qab tau los ua ib cim qoob loo siav thiab muab sau tseg rau nruab txhab tag, thiaj tau los npaj noj cim tsiab peb caug xyoo 1980 nyob rau nroog Thoj Vias. Lub sij hawm no tsoom Hmoob tau khiav ntau thaj chaw los nyob raws tus ntug dej xeev pib ntawm tus dej Naj Ces tshuam dej Xeev mus ti nkaus rau Zos Npab Kauj (Qub Zog).

    Lub caij txog peb caug zaum no tej nkauj nraug tus twg los kuj cia siab tias seb puas yuav tau rov tuaj ntsib tej qub phooj qub ywg, vim ib xyoos dhau los nyias los nyob raws nyias tej liaj tej teb nrog hav zoov nuj txeeg thiab tej suab kab noog quaj kho siab zim xwb, ib tug tsis paub tias ib tug nyob qhov twg. Hnub xiab 3 ntawm lub tsiab peb caug xyoo 1980 no thiaj ua rau txoj hmoo tau coj Yim Laj thiab Paj Huab nkawd los sib ntsib.

    Hnub ntawd thaum sawv ntxov tsees lub ntuj ua huab zig niab no ntxiag, tab sis tej tej nkauj nraug kuj tuaj zom zaws tuaj rau ntawm lub tiam tshav pob uas nyob rau ntawm lub zos Naj Ces. Lub sij hawm ntawd Yim Laj thiab nws ib tug phooj ywg los kuj tau tuaj ncig mus ncig los seb puas pom tej hluas nkauj ib txwm sib paub los, tab sis ntsia mus rau qhov twg los cas yog neeg tshiab xwb yeej tsis muaj ib tug nkawd paub li.

    Ua ke lub sij hawm Yim Laj thiab nws tus phooj ywg tab tom ncig saib seb puas muaj tej hluas nkauj nkawd paub. Yim Laj muaj ib tug phooj ywg uas nyuam qhuav lawv nkawd qab tuaj txog thiaj hais rau Yim Laj tias los tom no kuv coj neb mus saib ob tug hluas nkauj tod zoo nkauj kawg tiag. Yim Laj thiab nws tus phooj ywg thiaj txav zog mus, thaum lawv mus txog rau ntawm ob tug hluas nkauj ntawd. Muaj ib tug yog ib tug ntxhais uas Yim Laj ib txwm paub lub sij hawm khiav rog cob fab lawv tau mus nyob ua ke ib ntus hos ib tug Yim Laj yeej ib txwm tsis tau pom dua.

    Yim Laj thiab hu tias " Maiv Mim neb tuaj pov pob los," Maiv Mim teb tias "Aws...., Yog koj los Yim Laj" Yim Laj teb tias "Yog mas, thiab Yim Laj nug ntxiv tias "Maiv Mim tus ntawm koj yog leej twg?" Maiv Mim teb tias " Paj Huab os, nws yog kuv ib tug viv ncaus".



    Last edited by Ntsuj_Plig on Fri Oct 27, 2017 8:16 pm; edited 7 times in total
    Ntsuj_Plig
    Ntsuj_Plig
    Moderator


    Posts : 560
    Join date : 2011-02-15

    Roob Cuam Kau Lub Neej Ib Vuag Dua Empty Re: Roob Cuam Kau Lub Neej Ib Vuag Dua

    Post by Ntsuj_Plig Sun Apr 03, 2016 11:20 pm

    ROOB CUAM KAU LUB NEEJ IB VUAG DUA


    Txij ntawd los thiaj ua rau Yim Laj thiab Paj Huab nkawd tau sib paub. Hnub ntawd Yim Laj ntsia Paj Huab tsis paub dhuav hos Paj Huab los saib Yim Laj tsis paub txaus. Yim Laj xav tias kheev lam Paj Huab yog lub paj ntshe yuav muab deb kiag coj los hnia seb yuav tsw qab npaum li cas, hos Paj Huab los kuj xav tias kheev lam Yim Laj yog lub txiv ntshe yuav muab de kiag coj los noj seb yuav qab zib npaum li twg.

    Hnub ntawd Yim Laj thiab Paj Huab nkawd pov pob ib hnub yam tsis nco nkees, txawm tias lub ntuj yuav ua huab zig niab thiab no ntxiag los nyob hauv nkawd ob lub siab zoo tam li lub ntuj tshav ntuj nrig tab tom muaj tus duab tshav ci ntsa iab rau lub ntiaj teb ua rau nkawd lub siab sov so tsis nco hnov no li.

    Lub sij hawm Yim Laj thiab Paj Huab nkawd tab tom pov pob thiab tham lom zem xauv npos tsis nco qab saib qhov twg li, cas tig saib ib tog tshav pob neeg twb ntshiab tag mam saib cas lub ntuj tsaus zuag lawm. Yim Laj thiab Paj Huab nrog rau nkawd cov phooj ywg thiaj ua siab rov los mus tsev. Lub sij hawm los tej tog kev, hauv tej xub zoo twb tsaus zuag lawm tab sis lawv lub suab tham thiab suab luag tseem nrov ntxhe ntws zoo tam li lub zoov nuj txeeg nyob tau kaj liag. 

    Ib pliag ntshis xwb lawv twb los txog tsev lawm, thaum Yim Laj xa Paj Huab mus txog tsev lawm nws mam li ua ib siab rov qab los mus tsev thiab los npaj hmo noj. Hmo ntawd tom qab Yim Laj los noj hmo tas nws thiaj tau rov mus nrog Paj Huab tham dua, Paj Huab lawv lub zos nyob rau saum ib lub laj roob hav zoov nuj txeeg tsaus nti muaj li 4 - 5 lub tsev xwb. Muab xav mas kuj ntxim txaus ntshai dab ntshai tsov kawg li, tab sis Yim Laj los kuj ua siab tawv qhawv vim muaj Paj Huab nrog Yim Laj nyob. Lub sij hawm tsaus ntuj ib tag hmo dua kab teeb rau nram tej ntug zos hav zoov nuj txeeg tsaus nti, kab teeb rau saum tej ntsis ntoo los pom hmab nreeg hnyo xwb. Lub sij hawm ntawd tseem hnov Paj Huab lub suab ncas nrov nrog Yim Laj lub suab ntxhi tsis ntsiag. Ntawd nws yog ib zaug ntawm Yim Laj thiab Paj Huab nkawd txoj kev uas tau los sib paub thawj zaug.

    Suav txij ntawd los ua rau Yim Laj nco Paj Huab tsis ploj hos Paj Huab los nco Yim Laj tsis muaj chaw xaus. Yim Laj xav ntsoov tias muaj ib hnub twg yuav ua kom tau Paj Huab los ua nws tus niam tsev zoo vim tias Paj Huab yog ib tug ntxhais nquag thiab tij lim rau txoj kev ua noj ua haus. Hos Paj Huab los kuj cia siab ntsoov tias yuav ua kom ib hnub twg Yim Laj tau los ua Paj Huab ib leej txiv zoo, vim tias Yim Laj yog ib tug tub hluas uas muaj lub siab dawb siab zoo.

    Sij hawm muab cim tsiab peb caug xyoo 1980 noj tas ua rau tsoom Hmoob uas tau los nyob rau nroog Thoj Vias yuav tsum tau tsiv teb tsaws chaws dua zaum ob, vim tias nyob rau cheeb tsam no muaj kev phom sij rau sab kev mob nkeeg heev li. Raws li nej ib txwm tau hnov tej laus hais tseg tias "Yog leej twg mus Thoj Thoos - Thoj Vias los ces kav tsij yuav nyuj los npaj tos". Txhawm rau txoj kev tiv thaiv kom tsoom Hmoob sawv daws dim ntawm txoj kev ploj tuag, lawv thiaj yuav tsum tau tshais chaw dua mus rau yav toj siab.


    Last edited by Ntsuj_Plig on Fri Oct 27, 2017 8:16 pm; edited 2 times in total
    Ntsuj_Plig
    Ntsuj_Plig
    Moderator


    Posts : 560
    Join date : 2011-02-15

    Roob Cuam Kau Lub Neej Ib Vuag Dua Empty Re: Roob Cuam Kau Lub Neej Ib Vuag Dua

    Post by Ntsuj_Plig Sun Apr 03, 2016 11:28 pm

    ROOB CUAM KAU LUB NEEJ IB VUAG DUA



    Txoj kev tsiv teb tsaws chaw zaum no thiaj ua rau Yim Laj thiab Paj Huab nkawd plam mus ib leeg ib qho. Yim Laj los tsis muaj peev xwm paub tias Paj Huab mus dua qhov twg lawm, hos Paj Huab los kuj tsis paub tias Yim Laj cia li ploj dua twg lawm thiab. Vim tias tsoom hmoob uas los nyob rau Thoj Vias zaum no tau tsiv tawm mus nyob ntau thaj chaw, tsis tas li xwb muaj ib txhia kuj cia li khiav los mus rau thaib teb lawm thiab.

    Txij ntawd los ua rau Yim Laj haj yam nco Paj Huab heev tshaj qub hos Paj Huab los haj yam tshua Yim Laj dua yav tas. Lub sij hawm ib xyoos puag ncig ntawm txoj kev tsiv teb tsaws chaw zaum no ua rau Yim Laj tsis hnov Paj Huab ib ntsug moo, hos Paj Huab los yeej tsis hnov Yim Laj ib ntsug xov. Yim Laj xav tias ntshe Paj Huab twb mus ciaj luag nyab los Paj Huab yeej xav ntsuj ntsoov tias ntshe Yim Laj twb mus ciaj luag vauv thiaj tsis taug Paj Huab qab.

    Qhov tseeb tiag vim yog Paj Huab niam thiab txiv lawv coj Paj Huab los mus nyob rau Roob Cuam Kau lawm, hos Yim Laj los kuj tau tsiv nrog nws cov kwv tij mus nyob rau Tsua Xyuam Yaj lawm thiab. Ncua ke ntawm Roob Cuam Kau mus rau Tsua Xyuam Yaj nws txaus mus ib hnub tsaus ntuj thiab tseem yog hav zoov nuj txeeg tsis muaj ib txoj tseem kev yuav mus tau los yooj yim thiaj ua rau Yim Laj los tsis tuaj yeem paub tias Paj Huab mus nyob qhov twg lawm hos Paj Huab los tsis muaj peev xwm nug tau Yim Laj moo.

    Ncua sij hawm no txoj kev nkauj kev nraug ntawm Yim Laj thiab Paj Huab zoo tam li tus neeg mob uas suav hnub suav qaug zog zuj zus. Tus twg los xav tias ntshe muaj ib hnub kawg yuav qaug txaj lawm xwb. Yim Laj nco Paj Huab noj mov tsis hnov poob plab hos Paj Huab nco Yim Laj los haus dej tsis poob ce. Yim Laj zoo tam li tus neeg dig muag uas suav hnub suav tsis pom kev zuj zus, hos Paj Huab zoo tam li tus neeg mob raug dab poj ntxoog ib hnub tus ntsuj plig ncaim lub cev mus lawm deb zuj zus. Yim Laj nco Paj Huab nco tsim dhuj dheev ntuj teb tag hmo niaj dab ntuj tus npau suav nrog lub kua muag si, hos Paj Huab nco Yim Laj nco nco tshav ntuj nrig rau nkawd tej chaw ua si. 

    Sij hawm muab hnub suav mus ua hli muab hli suav mus ua xyoo, tom qab ib xyoos puag ncig uas tau los ua ib cim qoob sau tseg tas rau nruab txhab thiaj tau los npaj noj cim tsiab peb caug xyoo 1981 nyob rau Tsua Xyuam Yaj thiab Roob Cuam Kau. Tsiab peb caug xyoo no Yim Laj los xav ntsoov tias seb puas yuav pom Paj Huab tawm qhov twg los, hos Paj Huab los xav ntsoov tias seb puas yuav pom Yim Laj tuaj qhov twg tuaj. Xyoo no hmoov zoo uas Yim Laj lawv lub zos los kuj raug caw kom coj tej tub ntxhais mus koom noj peb caug rau Roob Cuam Kau. Hnub xiab 3 tom qab noj tshais tas Yim Laj thiab tsoom pej xeem hauv lawv lub zos thiaj tau npaj tuaj mus rau Roob Cuam Kau. Lub sij hawm tuaj txog Roob Cuam Kau lawm Yim Laj ncig ib lwm thoob plaws hauv lub tshav pob los kuj tsis pom Paj Huab, ua rau Yim Laj poob siab nthav tias " Ab...., Ntshe Paj Huab mus yuav txiv lawm ho, los yog tias Paj Huab lawv tsiv mus rau sab xeev lawm ne".



    Last edited by Ntsuj_Plig on Fri Oct 27, 2017 8:17 pm; edited 5 times in total
    Ntsuj_Plig
    Ntsuj_Plig
    Moderator


    Posts : 560
    Join date : 2011-02-15

    Roob Cuam Kau Lub Neej Ib Vuag Dua Empty Re: Roob Cuam Kau Lub Neej Ib Vuag Dua

    Post by Ntsuj_Plig Sun Apr 03, 2016 11:33 pm

    ROOB CUAM KAU LUB NEEJ IB VUAG DUA



    Lub sij hawm Yim Laj tseem tab tom ncig mus ncig los tsis qab siab pov pob vim tsuas xam seb puas pom Paj Huab xwb. Muaj ib tug ntxhais nyob hauv Yim Laj lawv zos tuaj thiaj los hais rau Yim Laj tias "Koj pheej xam dab tsi cas tsis mus coj tus hluas nkauj tod los pov pob" Yim Laj tig loo los thiab tsa hlo qhov muag mus saib cas yog Paj Huab tiag. Yim Laj thiaj teb tias " Oh.........., kuv tseem tab tom nrhiav tus hluas nkauj ntawd ntag." Ua ke ntawd Yim Laj txawm cia li txav zog mus ze rau ntawm Paj Huab thiab ua tib zoo ntsia seb puas yog Paj Huab tiag. Thaum ntawd Yim Laj pom Paj Huab zaum nrog ib co pog laus ua rau Yim Laj poob siab nthav tias "Ab...., Puas yog tias Paj Huab twb yuav txiv lawm no." Ua rau Yim Laj poob siab nthav thiab mus kiag ob - peb ruam ntxiv ti nkaus rau ntawm Paj Huab, Yim Laj thiaj hu tias "Nyob zoo os Paj Huab, cas tuaj tsis los pov pob na?" Paj Huab los kuj teb tias "Koj tuaj los Yim Laj, twb tsis muaj neeg thiaj tsis pov mas." Yim Laj txawm teb rau Paj Huab tias "Yog li sawv los wb mus pov pob os" thiab Paj Huab los kuj cia li sawv los nrog Yim Laj mus rau tom tshav pob qhov cov neeg tseem tab tom pov pob coob coob lawm.

    Hnub no tom qab Yim Laj thiab Paj Huab nkawd tau sib ntsib thiab tau mus pov pob ua ke lawm, nkawd ob leeg tau muab txoj nco los tham txhij txoj kev hlub los tham tham txhua. Yim Laj thiaj tau hais rau  Paj Huab tias " Paj Huab...., wb twb sib ncaim los tau ib lub xyoos ntuj zeeg tav li no lawm koj los nyob li cas thiab xav li cas lawm xwb" Paj Huab teb tias "Yim Laj yog yuav muab piav mas nws yog ib zag dab neeg ntev heev, tab sis qhia koj paub tias suav txij hnub uas kuv niam thiab kuv txiv tau coj kuv khiav tawm hauv nroog Thoj Vias los lawm uas kuv tsis tau hais ib los rau koj. Ua rau kuv nco koj zoo tam ntua li tus neeg mob uas raug dab poj ntxoog yuj tau lawm, suav hnub suav qaug zog zuj zus xav tias ntshe muaj ib hnub yuav zoo tam li tus neeg mob yuav qaug txaj mus." Paj Huab tau hais ntxiv tias "Yim Laj.., Ntawm koj ne yog vim li cas ib xyoos dhau mus lawm koj thiaj tsis nug kuv ib ntsug moo, hauv koj lub siab puas tseem noj qab los puas nyob zoo?" Yim Laj thiaj tau teb rau Paj Huab tias " Paj Huab..., Suav txij thaum muab lub tsiab peb caug xyoo tas nyob Thoj Vias xaus dua, kuv los kuj tau nce mus luaj teb rau Roob Xyuam Yaj lawm. Thaum kuv rob qab los txog tsev neeg zej zog khiav tag vaj tse nqha nrig, tsuas hnov tias nej lub zos los khiav tag lawm thiab kuv tsis paub tias nej khiav mus thaib teb los yog khiav mus rau sab xeev lawm. Txij ntawd los nug tsis tau koj ib ntsug xov ua rau kuv nco koj zoo tam li tus neeg dig muag suav hnub suav tsis pom kev zuj zus, xav tias ntshe muaj ib hnub twb yuav cia li tsis pom lub ntiaj teb uas tawg paj txi txiv zoo nkauj ntsa iab no mus lawm xwb tiag."

    Yim Laj hais ntxiv rau Paj Huab tias " Paj Huab...., hnub no kuv tau rov ntsib koj zoo ib yam li tus neeg dig muag tau ntsib tus cawm seej ua rau tus neeg dig muag cia siab tias nyaj nws lub qhov muag ib hnub yuav pom kev zuj zus." Paj Huab los kuj teb rau Yim Laj tias "Yim Laj..., kuv los ib yam thiab hnub no thaum kuv tau pom koj lawm zoo tam li tus neeg mob uas ntsib tau tus txiv neeb yuav cais tau tus dab poj ntxoog tawm ntawm tus neeg mob mus, xav tias yog zoo li hnub no xwb nyaj tsis ntev tom ntej no tus neeg mob ntawd yuav zoo zuj zus lawm." 

    Hnub ntawd Yim Laj thiab Paj Huab tau pov pob ib hnub tsaus ntuj nkawd ob leeg tau muab tej kev hlub los tham txhij kev nco los hais txhua. Ua rau Yim Laj los to taub Paj Huab zoo Paj Huab los ntseeg tej lus Yim Laj hais tas. Zaum no Yim Laj thiab Paj Huab txoj kev nkauj kev nraug zoo tam li tsob paj uas rov pib hlav mos nyoos tuaj. 



    Last edited by Ntsuj_Plig on Fri Oct 27, 2017 8:18 pm; edited 2 times in total
    Ntsuj_Plig
    Ntsuj_Plig
    Moderator


    Posts : 560
    Join date : 2011-02-15

    Roob Cuam Kau Lub Neej Ib Vuag Dua Empty Re: Roob Cuam Kau Lub Neej Ib Vuag Dua

    Post by Ntsuj_Plig Sun Apr 03, 2016 11:36 pm

    ROOB CUAM KAU LUB NEEJ IB VUAG DUA



    Ua ntej thaum Yim Laj thiab Paj Huab nkawd yuav sib ncaim ntawm lub tsiab peb caug xyoo no mus nkawd tau sib cog lus tseg tias yuav tsis pub kom muaj dab tsi rov los rhuav tshem tau nkawd txoj kev sib hlub sib nco li yav dhau los lawm.

    Tom qab lub tsiab peb caug xyoo 1981 tau xaus mus txoj kev nkauj kev nraug ntawm Yim Laj thiab Paj Huab nkawd los kuj yuav tau rov sib ncaim nyias mus nyias tsev. Hnub ntawd Paj Huab niam thiab txiv lawv los kuj tau coj Paj Huab tuaj mus saib nws niam cov dab laug nyob ib ncua kev ntawm Roob Cuam Kau thiab Tsua Xyuam Yaj kis nruab nrab. Hos Yim Laj lawv los kuj yuav tau los mus tsev lawm thiab.

    Lub sij hawm los txog rau ntawm Paj Huab lawv dab laug lub zos kuj pom tej hluas nkauj hluas nraug pov pob hais kwv txhiaj lom zem xauv npos. Yim Laj thiaj hais rau nws cov phooj ywg tias peb mus saib seb lub tshav pob no puas muaj hluas nkauj tso peb mam mus tsev, tab sis qhov tseeb tiag twb yog Yim Lam xav rov qab los saib seb puas ntsib Paj Huab ib zaug ntxiv ua ntej lawv yuav los mus tsev. Lub sij hawm lawv nqis kiag mus rau hauv lub tshav pob  cas xam ib muag thoob plaws tsis pom Paj Huab nyob qhov twg Yim Laj xav tias ntshe tseem ntxov heev Paj Huab lawv tuaj tsis tau txog.

    Ua ke ntawd txawm muaj ib tug hluas nkauj txawm cia li cuam pob tuaj rau Yim Laj thiab nws ib tug phooj ywg nkawd. Yim Laj nkawd thiaj tau mus nrog tus hluas nkauj ntawd pov pob, sij hawm tab tom pov kiag ob - peb pob xwb txawm hnov ib lub suab hu tom qab tuaj tias "Yim Laj..., muab koj lub hnab kuv coj mus cia koj thiaj zoo pov pob os." Yim Laj tig hlos los saib cas yog Paj Huab, Yim Laj thiaj hais rau Paj Huab tias "Paj Huab koj nyob qhov twg kuv xam tag twb tsis pom koj sav" Paj Huab teb tias "Kuv nrog kuv nyab lawv zaum ped xwb" Yim Laj mam ntsia peb cov pog laus uas zaum pawg lug no pom Paj Huab tus nyab zaum ped tiag. Yim Laj hais rau Paj Huab tias "Yog li los peb pov pob" tab sis Paj Huab teb tias "Muab koj lub hnab kuv nqa mus cia kuv mam tuaj saib nej pov pob." Yim Laj txawm cia li txo hnab rau Paj Huab nqa mus cia tom lawv dab laug lub tsev lawm thiab txawm tsis pom Paj Huab rov tuaj lawm. Yim Laj thiab nws tus phooj ywg pov pob zoj ib pliag xwb Paj Huab twb mus ua tau mov siav thiab rov qab tuaj hais Yim Laj tias "Yim Laj coj koj cov phooj ywg mus noj mov tsam nej yuav mus tsev." 

    Yim Laj thiab nws cov phooj ywg thiaj tau nrog Paj Huab los noj mov tas thiab rov qab tuaj pov ob - peb pob xwb ces Yim Laj txawm hais rau Paj Huab tias "Koj mus nqa kuv lub hnab los peb yuav mus tsev tsam tsaus ntuj." Paj Huab mus nqa tau Yim Laj lub hnab los rau nws, Yim Laj thiab nws cov phooj ywg txawm cia li los mus tsev lawm. Ua ntej sib ncaim zaum no Yim Laj saib Paj Huab zoo tam li ib tug ntxhais tsim txiaj heev, txawm yog yuav tuaj txog ib lub zos hmoob pov pob lom zem xauv npos los Paj Huab yeej tsis mus pov tob li tsuas yog tuaj zaum nrog nws tus nyab saib lawv pov pob xwb. Lub sij hawm Yim Laj twb los mus yuav dhau ntug zos tig rov mus saib Paj Huab tseem sawv ntawm nws tus hneev taw ntsia ntsoov Yim Laj tsis txav, haj yaj uas rau Yim Laj nco Paj Huab dua qub. Hos Paj Huab los muab Yim Laj kaw zais cia rau nws nruab siab ua tam li tus neeg tsis sib paub, tab sis qhov tseeb tiag Paj Huab los nco Yim Laj tsis heev tsis xav ncaim ntawm Yim Laj mus li.



    Last edited by Ntsuj_Plig on Fri Oct 27, 2017 8:18 pm; edited 3 times in total
    Ntsuj_Plig
    Ntsuj_Plig
    Moderator


    Posts : 560
    Join date : 2011-02-15

    Roob Cuam Kau Lub Neej Ib Vuag Dua Empty Re: Roob Cuam Kau Lub Neej Ib Vuag Dua

    Post by Ntsuj_Plig Mon Apr 25, 2016 1:51 am