Thaj Chaw Seev

"PAJ TAWG ZOONKAUJ"




Paj yog cov zoo nkauj tshaj plaws li
Tsuav pom Paj ces yeej nyob luag ntxhi
Paj yog cov kho tau neeg lub siab kom kaj
Tsuav pom Paj lawm ces tej mob nkeeg yuav yaj

Vim Paj qhov zoo nkauj ua tau rau neeg zoo siab
Yog pom Paj lawm ces yus lub siab cia li kiab
Vim Paj tawg tau zoo nkauj tshaj plaws li
Yog pom Paj thaum twg ces siab kaj nrig

Vim Paj kho tau txhua nrog hauv lub qabntuj
Paj yeej kho tau kom neeg lub siab muaj kev hlub
Vim Paj tawg tau tshiab thiab zoo nkauj heev tiag li
Yog thaum pom Paj lawm ces lub siab nyob tau luag ntxhi

Hmoob tej tub tus hais lus mos
puas tsim nyog rau wb sib paub
cia txhob haub thiaj tsis kho siab
tawm ntuj tshiab thiaj xav mus ncig
txhua tag kig thiaj li tsis seev
pw tsim dheev thiaj li feeb meej
kev ua neej thiaj li sov siab
mus ncig kiab thiaj txawj rov los
tham ib los ua phooj ywg xwb
txhob khib dwb kom ntau tshaj no
thiaj tsis nco tsis kho siab mog

Npauj Npaim, kuv me niam hluas ntxim hlub,

Vim ntuj pub peb tau sib ntsib
Tuaj ua si peb thiaj sib paub
Yuav tsis nrauj koj tej lus qhia
Ua li kiag cia wb ua vivncaus
Ua niamlaus los yeej tau kawg
Tsis txhob txhawj los wb uake
Kom paub npe wb mam sib pab
Tau kawg mad kuv me niamhluas
Txhob txaj muag los wb tham seb
Nyob puas deb ntawm kuv thiab ne
Npauj Npaim ...e..., zoo siab ntsib koj mog.

Niamhluas, me vivncaus nquag
Los kuv puag koj rau xub ntiag
Muab hnia kiag vim koj ntxim hlub
Thiaj tuaj hu tuaj tos kuv kev
Tsis mus tsev caum kuv nrog tham
Zoo ib yam wb yog viv ncaus
Me niam laus thiab me niam hluas
Tuaj sib xyuas tham lus sib qhia
Nyob sib ntsia luag ua tsheej tsaug
Tham kom txaus li rov mus dua
Tej kev tshua yeej tham tsis tag
Caj ntuj nag peb zaum nte taws
Nyob sib xyaws tham ua tsheej npoj
Mov tsis noj vim tsis hnov tshaib
Niam me naib los tsis nco qab
Vim li ntag thiaj tuaj sib caum uasi
Nyob luag ntxhi tsis nco txhawj li nas.

Los kuv puag koj thiab os niam laus Lubpajzoo
Kuv tsis muaj hmoo hnub no tuaj thiaj tsis ntsib
yam lub dib luag twb muab noj tag lawm aw
kuv txoj kev ntshaw niam laus ces koj yeej paub
kuv nim tuaj saub saub tos tos koj kawg
kuv twb ncawg ncawg ncawg koj heev
thiaj sau lus teev khaws cia tseg
thaum kuv veg koj mam rov tuaj
ua kuv quaj quaj tu siab tag npaum li
tsis hnov koj suab ntxhi kuv tsis paub nyob
ntshe kuv yuav tsis txob tsis tuaj ntxiv lawm lauj
lam tuaj xauj xauj seb puas muaj leej twg nco
nco koj txhua hnub hmo lub siab dai rawv ntawm koj
nco koj tsis ploj nyob rau kuv nruab siab
yuav nco koj mus ib txhiab tsis muaj hnub tshem
yog tus dej ntuj kem lawm thiaj tuaj tsis txog koj na
txawm nrog dav hlau ya los deb ua luaj
nyiaj tsis muaj ntshe tuaj tsis cuag
ces kuv lub kua muag ntws twj ywm
cia koj tshwm mam los hais nyob zoo
nrog koj koj nroo ib tsam los ib pliag
twb zoo tau kuv lub siab kiag lawm thiab
nco koj tshaj hauv nruab siab os niam laus siab zoo
kuv me Lubpajzoo nco ntsoov tias niam hluas hlub nws nawb mog

Tus sau yog, SiabRuaj

Nyob zoo Lubpajzoo

Lub paj zoo yeej yog lub muaj hmoo
Txhua tus nyiam raws saib thiab nug moo
Lub paj zoo yog lub pe ntshaw
Mus txog twg los yeej xav tau lub paj zoo
Vim lub paj zoo tawg tau tshiab ntxim peb sawv daws siab
Peb txawm mus ntev los nco ntsoov Lubpajzoo tus me ntxhiab
Yeej yuav tsum rov tuaj saib tuaj tuav hnia ib pa..hahahahaha

Nyob zoo os viv ncaus Lubpajzoo...tuaj saib koj lawm os

Tus sau yog, NkaujNyiag

LUB PAJ ZOO TUS NEEG ZOO NKAUJ
KUV TUAJ XAUJ POM KOJ LUAG NTXHI
TUAJ UA SI XAV TUAJ THAB KOJ
SIAB PUAS LOJ PUAS YUAV KAM HLUB
KUV LEEJ TUB TUS TSIS ZOO NRAUG
YOG XAIV RAUG KUV YEEJ YUAV HLUB
TAM HNUB QUB NYOB NROG DUAB HLI
TAM HNUB CI MUS PUV NTIAJ TEB
NYOB UA KE MUS TAG IB SIM MOG.....

Tus sau yog, Ntsuj Plig

NkaujNyiag,

Kuv ces tseem nyob li qub thiab mas
ua li koj ne ho puas nojqab nyobzoo nas
Kuv ces tseem niaj hnub ua haujlwm
vim li thiaj tsis tshua tuaj tshwm

Tabsis hnub no zoo siab tau ntsib koj dua
twb yog koj cov lus zoo ua rau kuv tshua
kuv thiaj rov qab tuaj txog thaj chaw no
vim koj tej lus zoo ua rau kuv muab koj nco

Thiaj rov qab tuaj dua vim xav ntsib koj thiab
tuaj pom dheev koj cov lus seev ua kuv kajsiab
Vim tseg ntev tsis tau ntsib koj lawm nco koj heev
tuaj pom dheev koj cov lus seev ua rau kuv kua muag teev

Thiaj los nug seb koj puas noj qab mus nyob zoo
kuv zoo siab heev thaum pom koj cov lus nug moo
Vim nco koj thiab nkaujhnubqub neb kawg li
tuaj pom neb ua kuv lub siab nyob luag ntxhi li yav thaum i

Maiv ntxim hlub, tus me niamhluas siab zoo
Ua tsaug ntau nws niaj hnub tuaj nug kuv moo
Nkaujhnubqub, tus me niamhluas lus mos
Ua tsaug ntau nws niaj hnub tuaj tos kuv mog

Kuv ces noj los qab haus los tsau heev lawm
Vim li thiaj nyob taus taus tsis pom tawm
Kuv ces haus los tsau hos noj los qab heev
Vim li thiaj nyob taus tsis tawm tuaj nrog nej seev

Kuv ces zoo li tus neeg quav yeeb mus haus tshuaj
Vim xav kom thum tau yeeb thiaj tsis xav tuaj
Kuv ces zoo li tus neeg quav cawv yuav tau tseg
Vim xav kom thum tau cawv thiaj tsis kho siab ned

Hahahaahaa, tabsis xav tias tsis tuaj los vim nco nco nej
Tuaj los zoo li lub ntuj no ua voj ua viag tsis paub taug kev
Xyov yuav taug txoj twg thiaj mus txog lub chaw so
Vim tseg tau ntev ntev lawm ces tsis paub pib qhov twg los

Ua neeg nyob txhob siab phem mog
Vim ntuj tso peb thiaj sib paub
Thiaj tuaj saub tuaj tham ua ke
Nyob ib tse koom ib lub txaj
Tham ua nqa nyob kaj siab lug
Peb txhua tug thov sib hlub mog
Thaum koj ntog los kuv pab rub
Thov pab hlub thaum kuv chim siab
Kom siab kiab tham nyob luag ntxhi
Lub hnub ci peb tuav tes rawv
Tuaj kawm ntawv kawm txawj kawm ntse
Nyob uake ua phooj ua ywg mus ib txhis mog.

Me viv ncaus Lubpajzoo,
Cas ntev luaj no tsis hnov nws moo,
Me vivncaus Lubpajzoo ntxim hlub,
Uali koj puas tseem nco tau kuv?

Me vivncaus Lubpajzoo,
Uatsaug koj tuaj nrog peb sibnug moo,
Me vivncaus Lubpajzoo ntxim nyiam,
Uali koj puas tseem nco tau kuv thiab?

Me vivncaus Lubpajzoo,
Kuv ces lam tuaj sau pajhuam nug koj moo,
Me vivncaus Lubpajzoo tus kuv nco,
Uali koj puas paub tias kuv yog leejtwg no?

Me niamhluas NpaujNpaim
Kuv nco tau koj yog tus nrog kuv tsiv nraim
Me niamhluas NpaujNpaim tus siab zoo
Ua tsaug nws tseem tuaj nrog kuv sib noog moo

Me niamhluas NpaumNpaim
Kuv nco tau koj thaum wb pos muag khiav tsim nraim
Koj hais tias kom kuv txhob qhia leejtwg
Ua tsaug nws tseem tuaj nrog kuv ua phoojywg

Me niamhluas NpaujNpaim
Kuv nco tau tias nws yog kuv pos muag khiav tsiv nraim
Koj hais tias kom kuv tuaj nrog koj sau pajhuam
Kuv thiaj tuaj nrhiav koj, wb thiaj sib ntsib pem kev tshuam

Me niamhluas NpaujNpaim
Kuv nco koj kawg tuaj wb pos muag khiav tsiv nraim
Kuv zoosiab nws rov tuaj ntsib Lubpajzoo
Ua tsaug nws tseem tuaj nrog kuv tham pem sib noog moo

Kuv tuaj lig lawm ces tsis ntsib koj,
Los koj mus zoo es txhob khuvxim mog,
Kuv tuaj lig lawm tsis tau nrog koj tham,
Los koj mus zoo es txhob xav licas,

Cia lwm hnub kuv mam tuaj ntsib koj dua,
Yog nco kuv ces rovqab tuaj wb sib cuag,
Cia lwm hnub kuv mam tuaj ntsib koj nawv,
Yog nco kuv ces tuaj wb sib taub,

Hahahaa, me niamlaus, kuv nco koj nas,
Vim tsis muaj neeg nrog kuv tham li as,
Kuv paub koj mus lawm yuav tsis tuaj,
Kuv nco koj vim tsis muaj neeg nrog kuv sau pajhuam lawm na, niamlaus.

Nyobzoo os, me vivncaus, Lubpajzoo,
Zoosiab heev uas nws rovqab tuaj nug peb moo,
Me vivncaus Lubpajzoo, tus neeg txawj xav,
Zoosiab heev uas nws rovqab tuaj nrog peb tham,

Peb txhua tug mas nco nco koj kawg li,
Yog muaj sijhawm los ho rovqab tuaj nrog peb uasi,
Peb txhua tug mas nco nco me vivncaus, Lubpajzoo,
Yog muaj sijhawm los ho rovqab tuaj peb sib nug moo os mog.

Nyob zoo rau koj thiab os, Npauj Npaim
Tau ntev heev lawm kuv tsis tau tuaj nrog koj tsiv nraim
Kuv me niamhluas Npauj Npaim tus zoo lus
Kuv tuaj ntsib nws ib pliag xwb ces twb yuav rov mus

Nws nyob no ces nco kuv thiab nawv mog
Lwm zaus zoo sijhawm kuv mam rov tuaj dua os
Nws nyob no ces lom zem pub rau kuv thiab
Lwm zaus zoo sijhawm mam tuaj nrog nws tham ywj siab mog.

Yog muaj hmoo mus thawj dua thiab
ua mos liab los rau pajzoo puag
yuav tsis quaj mus tas ib txhis
tsis noj mis los yeej tsaug zog
thaum nco txog mam puag pajzoo
ua yog toog tias yog tus hlub
yav thaum ub wb tau hais tseg
lub neej ntshe yuav tshav ntuj nrig
me ntsuj plig siab yuav kaj lug
thaum kaj ntug pajzoo yuav sawv
mam tuav rawv paj zoo txhais tes
hnia tas ces zoo siab tsaug zog
lub neej no puas yuav muaj tseeb
kheev lam feeb tau los kom meej
wb lub neej yuav nyob kaj siab
ab mos liab yuav tsis quaj taug
niam mam tsaug niam nrog dab ntub
cia leej tub mam pw xub ntiag
mam puag kiag niam rau nruab siab
yuav hlub thiab nco niam mus ib sim ..... xwb tiag!!!

Sau los ntawm, Ntsuj Plig

Lubpajzoo lawv tej me nyab
muab me ab lawm los tsis tau
hmoob tej vauv tseem xav los thab
lawv tus nyab puas tau muaj vauv
tsam mag xauv ntshe yuav txaus ntshai
hmoob me ntxhais puas yog nkauj xwb
cia koj wb ho los sib paub
tsa suab saub seb puas sib nyiam
lawv poj niam no thov zam kev
yog lawv sev no kuv thov txim
lam tuaj fim ua phooj ywg xwb
hos yog wb ho muaj txoj hmoo
txaus siab loo kuv yuav hlub koj
teb muaj nroj los cia kuv dob
cia koj nyob zov wb me ab
noj kom qab da dej dawb paug
cim nkauj nraug cia hais npaum no
yog lwm hmo ntsib mam tham dua mog....

Sau los ntawm, Ntsuj Plig

Rooj teb no cas yuav kho siab ua luaj
Lub siab quaj thaum hnov koj npe
Lub suab ntxhe hais tau zoo mloog
Ua zog koog zoo li feeb tsis meej
Zos ceeb tsheej yog chaw dai siab
Toj roob siab muaj huab cua zoo
Hnov dej nroo nyob tau ntxias zias
Tej cua txias tuaj tshuab lub cev
Nyob hauv tsev los yog nraum zoov
Yog kuv hmoov thiaj tau ntsib koj mog
Los ntawm no kuv nrog koj tham
Puas yuav kam nas me nraug Hmoob?

Sau los ntawm, Lubpajzoo

Nyob tojsiab hnov suab cuam kau
tseem nco tau nyob ntuj qub qab
me muv dab ya ua tsheej npoj
tuaj mus noj thiab ya ntxais paj
thaum ntuj kaj qaib qua zom zaws
hmoob sawv daws lawv tej me ntxhais
sawv ua tshais muab mov cub kiag
tig xub ntiag los saib ib vuag
sawv ntxuav muag thaum yuav kaj ntug
pom tib tug plhu dawb mos nyoos
muab nqaim nploos coj los pib xwv
ces txawm qhwv thiab mus ntim su
thiaj pib hu tej nyab tej nus
lawv thiaj mus ua liaj ua teb
ncua kev deb los yeej tsis nkees
tham seev yees txoj kev kho siab...xwb tiag!!!

Sau los ntawm, Ntsuj Plig

Thaum tuaj ncig pom lubpajzoo
lub siab nroo tsis xav mus tsev
thov ua sev mus ua kuv nyab
nyob ib sab ntawm kuv xub ntiag
txawm ib pliag haj tseem zoo dua
tsis sib cuag mus tag ib sim
kuv puas phim koj lawm tiag os
tej ntxhais mos puas yog nkauj xwb
hos kuv twb muaj 50 xyoo
muab xav loo laus dhau lawm os
lawv ntxhais mos yuav tsis kam tiag
cia mam nyiag muab hnia ib pas
zoo li cas los kav liam mog
kom nco txog tias yog kuv xwb
ntxhais nkauj xwb koj puas kam na???!!!

Sau los ntawm, Ntsuj Plig

Tsis yog thuam hais li muaj tseeb
thiaj muab feeb los ua paj huam
koj tsis ruam lub siab tshajlij
thiaj xav ntxhi nrog koj tham xwb
puas kam wb hos nyob ua ke
mam sib nte sib thab sib tawb
sab plhu dawb cia rau kuv tom
seb puas pom wb tus duab luag
nyob zem zuag rau hauv lub siab ...os mog!!

Sau los ntawm, Ntsuj Plig