Ncaim Cev Tsis Ncaim Siab

Npauj Npaim Txoj Kev Hlub, Continues...,

Ua rau Npauj Npaim ceeb thiab txais tsis tau lub khaubhnab ces lub khaubhnab poob lawm. Npauj Npaim tig loo los saib no yog Ntsuj Plig ces nws ntsia ntsia Ntsuj Plig xwb tsis mus khaws lub khaubhnab li. Tus tubhluas uas nrog Npauj Npaim pov ntawd mam los mus khaws lub khaubhnab nqa los txog ntawm Npauj Npaim ces nws pom Npauj Npaim nrog Ntsuj Plig tham. Nws txawm cev lub khaubhnab rau Npauj Npaim thiab hais tias, “Leej muam, koj lub pob os.”
Npauj Npaim tig los txais lub pob thiab hais rau nws tias, “Ua tsaug os.”
“Tsis ua cas, mam sib ntsib dua nawd,” nws hais tag ces nws mus lawm. Npauj Npaim thiaj cev lub pob rau Ntsuj Plig tias, “Koj puas kam nrog kuv pov pob mas lod?”
“Kuv ntshai tsam koj tsis kam xwb?” Ntsuj Plig hais luagntxhi ntsia ntsoov rau Npauj Npaim ces Npauj Npaim thiaj hais ntxiv tias, “Yog ntshai tsam kuv tsis kam no ces kuv twb kam lawm, koj tseem yuav tos leejtwg os?”
Ntsuj Plig teb tias, “Tsis tos leejtwg li lawm, tsuas tos koj ib leeg lawm xwb.”
“Tsis yog koj twb mus pov khaubhnab txaus lawm es lam los sim kuv siab lawm xwb lod?” Npauj Npaim nug Ntsuj Plig.
“Koj xav li ntawd rau kuv lod?” Ntsuj Plig hais ntsia ntsoov rau Npauj Npaim. Npauj Npaim thiaj teb tias, “Yog, vim kuv twb tos koj tau ob peb sij no tsis pom koj tshwm li ne.”
Ntsuj Plig thiaj hais ntxiv tias, “Koj puas tos kuv tiag mas? Kuv twb tuaj ntxov lawm thiab tabsis yeej nrhiav tsis ntsib koj li thiaj los nrog kuv cov phoojywg pov khaubhnab rau ib cov hluasnkauj nyob sab nrad lawm mas es thov zamtxim rau kuv os.”
“Tsis ua licas tsuav koj qhia tseeb rau kuv xwb ces tau lawm,” Npauj Npaim teb ib tug mluas mluas. Ntsuj Plig thiaj hais rau Npauj Npaim tias, “Koj twb tuaj txog ntev lawm thiab pod?”
“Aws,” Npauj Npaim teb thiab hais ntxiv rau Ntsuj Plig tias, “Koj puas nrog kuv pov khaubhnab? Yog koj tsis pov ces wb yuav tau tawm ntawm no mus ncig tham rau lwm qhov chaw vim ntawm no tsis zoo tham ntau na.”
“Tau mas, cia wb pov khaubhnab ib pliag tso mam tawm mus tham lawm lwm qhov chaw nawd,” Ntsuj Plig teb rau Npauj Npaim tag ces nws thiaj txav mus ob peb ruamkev ces pov khaubhnab los rau Npauj Npaim txais lawm. Nkawd thiaj pov khaubhnab uake thiab tham luagntxhi nyob tsaus ntuj ntais Ntsuj Plig mam nrog Npauj Npaim los mus tsev lawm.

To be continues...,

npaujnpaim aw kuv nco koj os, kuv tuaj hais nyob zoo rau koj o niam laus siab zoo a

Npauj Npaim

Nco ntsoov tias wb tsis tshuav dab tsi lawm tsuas yog tshuav wb zaj dab neeg xwb tsis txhob muab tso tseg kav tsij tuaj sau cia kuv mam tuaj nyeem mog. Zoo siab uas koj sau tau ntau kawg ntxiv lawm os, ntshe kuv yuav tau coj mus khaws cia ua ib phau ntawv ho.....

npauj npaim e tag kis khoom mam tuaj nrog koj sau paj huam os mos

Nyobzoo Maivnximhlub,

Uali os, muaj sijhawm ces tuaj saib kuv thiab os.

Tau ib ntus no koj tsis hu kuv lawm, kuv nco nco koj li os.

Puas yog koj chim rau kuv lawm nas, me niamhluas?

Txhob chim mog, txawm kuv mus koom pawg ntseeg lawm los kuv yeej tsis tso koj tseg li os mog.

Hlub thiab nco koj mus ib sim li os mog.

Npauj Npaim wrote:Nyobzoo Maivnximhlub,

Uali os, muaj sijhawm ces tuaj saib kuv thiab os.

Tau ib ntus no koj tsis hu kuv lawm, kuv nco nco koj li os.

Puas yog koj chim rau kuv lawm nas, me niamhluas?

Txhob chim mog, txawm kuv mus koom pawg ntseeg lawm los kuv yeej tsis tso koj tseg li os mog.

Hlub thiab nco koj mus ib sim li os mog.

Niam laus kuv pom koj zoo lawm ces kuv yeej zoo siab xwb os
koj txawm ua ab tsi los koj yeej yog kuv niam laus li qub os
Tsis muaj hnub kuv yuav hnov qab koj li os nawb
twb yog kuv phej mus kawm ntawv me me thiab es sij hawm tsis txaus kuv tuaj ua si xwb os.
kuv yeej nco koj heev li qub thiab nawb

maivntximhlub wrote:

Lub teeb yog kuv qhov pom kev
Nws cig lam lug rau kuv mus txog tsev
Lub teeb cig nyob ze kuv qhib txoj kev kaj siab
Nws pab kuv taug mus nrhiav txoj kev hlub tshiab
Lub me teeb cig lam lug tuaj
Nws pab txhawm kuv txoj kev quaj
Lub teeb zoo cig rau ntiaj teb pom kev nrig
Nws yuav tuav kuv tes tsis pub kuv poob kuv tus tsuj plig
Txoj kev hlub nws yog lub teeb
Rau peb taug nws yog qhov tseeb
Nyob rau hauv peb nruab siab tawm los
Txawm peb nyob qhov twg los kav tsij taug mus tsis txhob tos

Hmmmm...., koj seev tau zoo ua luaj es kuv twb tsis paub seev ib zaj los phim koj zaj ces mam cia koj tuaj seev rau kuv mloog xwb os, niamhluas.

Ua tsaug koj tseem tuaj pab zov tsev thiab mog.

Kuv yuav nyiag wb zaj dab neeg nqa mus os Npauj Npaim
Koj puas kam na??

Hahahaha, koj nyiag mas tsis tau tabsis koj nyeem mas tau kawg li os.

Nyobzoo cov phoojywg,

Kuv lub sijhawm tsis txaus tabsis kuv yuav nrhiav sijhawm los sau zaj lus nruag no seb mus puas txog rau qhov xaus. Yog tias hnub twg kuv tsis xyeej tuaj sau mus ntxiv lawm no, Ntsujplig koj tuaj sau ntxiv mus kom kawg nawd. Kuv mam qhia qhov xaus rau koj es yog kuv tsis khoom tuaj ces koj ho tuaj sau mus kom tag nawd.

Hnub xiab ob:

Hnub xiab ob no Npauj Npaim sawv los npaj tshais noj tag ces nws muab khawbncaws los hnav twb tsis tau tag ces Ntsujplig twb tuaj nyob sab nraud tos nws lawm. Thaum nws hnav tag xwb ces nws thiaj tawm mus saib lub hnub puas ci zoo nkauj. Thaum nws tawm tuaj txog sab nraud ces nws pom Ntsujplig sawv nraud tos nws. Nws thiaj hu tias, “Nyobzoo os, Ntsujplig. Koj twb tuaj thaum twg lawm nas?
“Kuv lod? Kuv twb tuaj nyob ntev lawm os.”
“Tiag? Ua cas ho tsis los tsev mas lod?”
“Yeej xav los mas tabsis tsam koj tsis zoo hnav khaubncaws thiaj nyob nov tos xwb.”
“Lod?” Npauj Npaim hais.
“Aws,” Ntsujplig teb thiab luag ntxhi rau Npauj Npaim ua rau Npauj Npaim tsis paub hais licas ntxiv lawm. Ntsujplig thiaj nug tias, “Ua cas, puas yog koj chim rau kuv lawm nas?”
“Wmmm…, tsis chim li os. Xav tsis txog tias koj yuav tuaj ntxov li no li os.”
“Koj tsis npaj siab tos kuv li ntag? Koj tsis paub tias kuv txhawj koj li no lod?” Ntsujplig hais ntsia ntsoov rau Npauj Npaim xwb. Npauj Npaim thiaj teb tias, “Ua cas kuv ho paub ma vim ntev lawm koj twb tsis tuaj li no ces kuv thiaj tsis tos mad.”
“Npauj Npaim, thov zam txim os. Qhov tseeb tiag kuv yeej xav tuaj tos koj txhua tagkis hod.”
“Puas yog mas? Txhob lam dag tsam kuv tos tos koj tsis qab siab mus ua noj laiv?” Npauj Npaim hais ntsia ntsoov rau Ntsujplig thiab luag ntxhi xwb. Ntsujplig thiaj txav zog los ze thiab cev tes los tuav Npauj Npaim tes. Nws hais rau Npauj Npaim tias, “Ab…, kheev lam lub sijhawm txhob rawm mus es cia kuv nrog koj nyob li no kom ntev ntev mas yom?”
“Ntsujplig, koj hais li uas koj twb npaj txhij lawm tias koj yuav tso kuv tseg no na?
“Wsm…, tsis muaj abtsi os. Yog koj npaj txhij lawm ces wb mus uake lawm tim tshav pob os?” Ntsujplig hais rau Npauj Npaim. Npauj Npaim thiaj teb tias, “Aws, tos kuv qhia kuv niam tso wb mam mus os.”

To be continues...,

Npauj Npaim Txoj Kev Hlub, continues...,


Npauj Npaim thiaj nkag rovqab mus hauv tsev mus qhia nws niam tag ces nws tawm tuaj nrog Ntsujplig uake taug kev mus tim tshav pob pebcaug lawm. Thaum nkawd tuaj txog tim tshav pob ces Maiv Paj lawv tuaj zomzaws tuaj lawm thiab. Maiv Paj thiaj hu Npauj Npaim tias, “Nyobzoo hnub ob rau neb os Npauj Npaim thiab Ntsujplig. Ua cas hnub no neb yuav tuaj ntxov ua luaj li os?”
“Nyobzoo rau koj thiab os, Maiv Paj. Tos tias wb ho tuaj ua ntej koj lawm los vim hnub no Npauj Npaim zoonkauj heev li na,” Ntsujplig hais luag ntxhi rau Maiv Paj thiab Npauj Npaim nkawd. Npauj Npaim thiaj teb tias, “Nyobzoo os, Maiv Paj. Tos tias hnub no kuv ho tuaj tau ntxov los vim muaj Ntsujplig tuaj tos kuv thiab nrog kuv uake lawm os. Kuv zoo siab heev li os, Maiv Paj. Koj pab qhia nws tias kuv zoo siab no nawd.”
“Aws, uali mas. Kuv mas zoo siab heev thaum pom neb ob leeg nyob luag ntxhi li no lawm os. Tsis tas kuv yuav ua tus cev neb tej lus ntawm ib tug rau ib tug li, pom neb uake li no xwb ces kuv twb zoo siab lawm. Thov kom neb sib sib hlub li no thiab kom kav tag ib txhis xwb mas nawd,” Maiv Paj hais luag ntxhi thiab ces lawv sawv dawv luag uake.
Thaum lawv tseem tabtom luag luag uake tsis tau tag ces Tub ho tuaj txog ntawd thiab. Tub thiaj los hais rau Maiv Paj tias, “Ua cas hnub kuv tus me hlub nim yuav zoosiab ua luaj li ne? Ua li kuv puas paub txog nws qhov kev zoosiab thiab mas lod?”
“Thov zam txim os, twb yog kuv zoo siab tias hnub no wb muaj hmoo heev tau ntsib Npauj Npaim thiab Ntsujplig nkawd ua ntej thaum peb yuav mus lawm hauv tshav pob no xwb os,” Maiv Paj hais qhia rau Tub tag ces Ntsujplig thiaj cev tes mus tuav Tub tes hu tias, “Nyobzoo os npawg.”
“Aws, nyobzoo rau koj thiab nawd. Zoo siab tias hnub no peb tau sib ntsib ntxov lawm,” Tub hais rau Ntsujplig thiab tuav Ntsujplig tes. Ntsujplig thiaj hais rau Tub tias, “Kuv los zoo siab hnub no tau ntsib koj thiab os, Npawg. Yog nej npaj txhij lawm ces peb mus lawm hauv tshav pob, mus pov khaubhnab uake mas lod?”
“Aws, uali mas,” Tub teb Ntsujplig tag ces nws thiaj cev tes mus tuav Maiv Paj ces nkawd mus ua ntej lawm. Ntsujplig thiaj hais rau Npauj Npaim tias, “Npauj Npaim, koj puas kam tuav kuv tes nrog kuv mus uake thiab mas lod?”
“Wsm…,” Npauj Npaim teb thiab cev tes mus rau Ntsujplig. Ntsujplig thiaj tuav Npauj Npaim tes ces nkawv mus lawm thiab.


To be continues...,

Npauj Npaim Txoj Kev Hlub Continues...,


Hnub no lawv plaub leeg tuaj pov khaubhnab lomzem xauv npo ib hnub li. Npauj Npaim thiab Maiv Paj nkawd txawj txawj hais kwvtxhiaj ces muaj Hmoob coob coob los ntsauv nkawd. Npauj Npaim thiaj ua zoo saib no ua cas pom Nplooj thiab Tsheej nkawd los txog ntawd thiab. Npauj Npaim txaj muag thiab tsis hais kwvtxhiaj lawm. Ces Nplooj txawm nam kiag los hais rau Npauj Npaim tias, “Nyobzoo os, leej muam.”
“Nyobzoo os, Nplooj. Koj tuaj thiab lod?” Npauj Npaim hais.
“Aws, ua cas koj twb txawj pov khaubhnab thiab tsis yog txawj pov khaubhnab xwb hos tseem txawj hais kwvtxhiaj tag npaud li es puas kam hais ib zaj kwvtxhiaj pub kuv mloog thiab nad? Npauj Npaim thiaj teb tias, “Kuv ces lam tau lam hais vim Maiv Paj yog kuv tus vivncaus es nws hais ces kuv lam hais nrog nws xwb os. Kuv twb tsis txawj li os.”
“Txhob dag mas, kuv twb hnov koj hais kwvtxhiaj zoo heev li ned. Ua cas kuv los txog ces koj ciali tsis hais lawm mas lod?” Nplooj los sawv ze ze ntawm Npauj Npaim thiab nrog nws tham tuj taws ces ua rau Ntsujplig khibkhib lawm thiab. Ntsujplig thiaj pov los ze zujzus kom nws los hnov seb Npauj Npaim tham lus licas nrog tus hluas ntawd. Nws thiaj txav los ze ces nws hnov tus hluas tham tias, “Npauj Npaim, thov los mas, thov hais ib zaj kwvtxhiaj pub kuv mloog ib zaug vim kuv tuaj kev deb tuaj nas.”
“Wsm…, kuv twb tsis txawj hais tiag tiag li os. Lam tau lam hais uasi xwb twb tsis tau kawm li ces cia hmo no kuv mus kawm ntawm kuv niam tagkis mam tuaj hais rau koj mloog nawd, Npauj Npaim teb rau Nplooj. Nplooj thiaj nug ntxiv tias, “Npauj Npaim, tej tug zoo zoo nkauj li nej puas tau muaj tus hlub mas lod?”
“Wsm…, qhia tsis tau rau koj lub sijhawm no nawd. Thov zamtxim os,” Npauj Npaim hais. Nplooj txawm nug ntxiv tias, “Ua cas thiaj qhia tsis tau? Puas yog tias koj tsis tau muaj tus hlub dua li nas lod?”
“Thov zam txim nawd. Kuv yuav tsis teb koj lolus nug vim hnub no yog kev lomzem rau peb txhua tug xwb es koj txhob xav licas nawd,” Npauj Npaim hais luag ntxhi ces yim huab ua rau Nplooj nyiam Npauj Npaim lawm thiab. Nplooj tsis txav ntawm Npauj Npaim li txawm tias nws pov khaubhnab rau Ntsujplig los Nplooj yeej nrog Npauj Npaim tham luag ntxhi thiab ntsia ntsoov Npauj Npaim xwb. Maiv Paj saib zoo li Nplooj ntsia ntsoov Npauj Npaim yeej tsis khiav li ces Maiv Paj thiaj hais rau Nplooj tias, “Leej nus, koj mus nrog ob tug nus sab tod sawv uake es peb pov khaubhnab mas lod?”
“Yog lawm, koj mus sawv nrog Ntsujplig thiab Tub nkawd uake peb pov pob mam tham nawd,” Npauj Npaim hais ntxiv thiab. Nplooj teb rau nkawd tias, “Kuv twb xav nyob ze ze neb li no xwb tsis kam lod?”
“Tsis yog tsis kam na. Vim hnub no yog ib hnub peb xav muaj kev lomzem yog li thiaj thov kom koj mus sawv nrog cov txiv neej sab tod peb pov khaubhnab uake xwb os,” Maiv Paj hais. Nplooj hais ntxiv tias, “Npauj Npaim, kuv xav hnov koj lub suab hais lus txawm koj tsis kam hais kwvtxhiaj kuv mloog los thov cia kuv nyob nov mloog koj hais lus xwb puas tau os?”
“Wsm…, kuv xav mas koj mus sawv nrog lawv peb pov khaubhnab tso peb mam hais kwvtxhiaj ntshe yuav lomzem dua os, leej nus,” Npauj Npaim hais luag ntxhi ces Nplooj yim huab vwm rau Npauj Npaim lawm thiab xwb. Nplooj yeej tsis txav taw li nws nyob ntev loo nrog Npauj Npaim ces ua rau Ntsujplig nyuajsiab thiab txais tsis tau lub khaubhnab li lawm. Npauj Npaim pov tuaj ces Ntsujplig tsis txais li pheej cia raug nws thiab poob lawm xwb. Npauj Npaim thiaj xav zoj tias, “Ab…, ua licas rau Ntsujplig lawm ne? Puas yog nws khib kuv lawm nas? Cas zoo li nws tsis xav txais pob lawm yuav ua licas ne?”

To be continues...,

Npauj Npaim Txoj Kev Hlub, continues...,

Maiv Paj pom tej no thiab ces nws thiaj hais rau Tub thiab Ntsujplig nkawd tias, “Ob tug nus, peb pov khaubhnab li no xwb es zoo li peb tshaib tshaib plab lawm ces peb mus nrhiav noj tso yom?”
“Aws, tau kawg os,” Tub teb tag ces nws txawm rub Ntsujplig nrog nws mus lawm. Nws thiaj hais rau Ntsujplig tias, “Npawg, puas yog koj khib Npauj Npaim lawm nas?”
“Kuj yog, vim nws tham hluasnraug kiag ntawm kuv ob lub qhovmuag lawm nas.”
“Txhob txhawj rub siab ntev mas Npawg,” Tub hais rau Ntsujplig.
“Yuav rub siab ntev tau licas no thaum yus tus hlub tham lwmtus lawm nas?” Ntsujplig hais tag ces Tub thiaj teb tias, “Twb tsis yog Npauj Npaim txhob txwm tham ned. Koj yuav chim rau nws tau licas na. Tej no yog kev lomzem xwb, leej twg yuav tham los yuav tau rub siab ntev mas nawd.”
“Yog li koj ua ib yam pub kuv puas tau?” Ntsujplig nug.
“Tau mas, koj xav kom kuv ua abtsi mas lod?” Tub nug thiab. Ntsujplig thiaj hais rau Tub tias, “Kuv xav kom koj mus hais rau Maiv Paj coj Npauj Npaim mus tsev tsam ces ho muaj tej yam txawm tshwm sim uas yus tsis nco ceev faj na.”
“Uali, kuv mam mus hais kom nkawd mus tsev es koj ua siab ntev nawd,” Tub hais tag ces nws thiaj los hais rau Maiv Paj kom coj Npauj Npaim mus tsev lawm.


To be continues...,

Tsaug tsaug zog ces mus nrhiav kwvtxhiaj los mloog lawm xwb os lawv aw..., nej tsis tuaj nrog kuv tham li ces kuv yuav tau ncaim nej mus lawm es nej mam nyob os...,