Ncaim Cev Tsis Ncaim Siab

Kheevlam tig tau rovqab ntshe kuv yuav ncav tes tuaj tuav koj npab

Kheevlam tig tau rau lub sijhawm puag thaum i ntshe kuv yeej kam txav ti

Kheevlam tig tau lub sijhawm qub ntshe kuv yuav tso siab nrog koj sibhlub

Kheevlam tig tau nyob tej qub chaw ntshe kuv yuav ua tus nyob nraim hauv koj lub plawv

Tabsis sijhawm dhau mus lawm yeej tig tsis tau lawm tiag tiag

Hnub no kuv thiaj tsis tau nyob hauv koj lub me xubntiag

Vim sijhawm yeej dhau mus lawm tsis rovqab los zoo li qub

Hnub no wb thiaj plam wb txoj me kev sib nco sib hlub...., mus li lawm os, me nraug Hmoob Vaj.

Koj puas tseem nco txog lub sijhawm kuv tuaj txog USA, nyob Seattle

Koj tuaj TAXI 8 hours tuaj cuag kom tau kuv thiab tuaj saib kuv ib muag

Kom koj pom thiab ntseeg tias kuv yeej tuaj txog lawm tiag tiag li no os?

Kuv tseem nco tau tabsis ua cas lub sijhawm ntawd kuv yuav ruam ua luaj

Koj tuaj saib kuv ib zaug es tuaj deb deb tuaj los kuv twb tsis paub nrog koj tham ib los

Kuv lub siab nyiag nyiam koj tag nrho rau lub plawv tabsis hais tsis tau ib lolus tawm

Nco lub sijhawm ntawd kawg li, kheev lam sijhawm tig tau rovqab es kuv yuav rov qhia koj

Qhia txhua yam rau koj tias thaum koj ncaim kuv mus USA lawm mob kuv lub siab npaum licas

Kuv lub siab mob heev, koj puas paub na?  Niaj hnub no yeej tsis tau qhia koj li os. 

Nco koj rau lub sijhawm ntawd kawg li.  

Ua cas koj tsis rub kuv puag kiag rau koj lub siab nyob luag ntxhi li no???

Yam uas muaj tshwmsim ib zaug dhau los lawm,
Yeej muab nws rho tsis tau tawm
Yog kuv paub koj ib zaug dhau los hauv kuv lub neej lawm
Txawm pes tsawg xyoo los koj tus duab yeej tshem tsis tau tawm ib yam os...,

Ua tsaug qhov kuv paub koj ib zaug dhau los lawm mog
Tej thaum rov xav txog kuj txhawb tau kuv lub zog
Vim twb sib paub ib zaug yeej yuav nco ntsoov mus ib txhis
Txawm tias kuv muab hais tawm los thov koj tsis txhob chis mog.

Ncaim lawm os..., mam nyob koj nawv...,    

Yam uas nws twb muaj ib zaug dhau
Txawm licas los yeej lwv tsis tau
Tsis hais yam phem los yam zoo li
Yeej yuav nco ntsoov mus tag ib txhis

Tus phoojywg uas kuv paub los puag thaum ub
Txawm nws yuav dhau mus ua leejtwg tus hlub
Los kuv tsuas cim tau nws li yav tag los xwb
Vim paub ib zaug lawm yeej lwv tsis tau hauv lub hlwb

Qhov no yog lub siab menyuam yaus thaum tseem yau
Kuv xav tias peb txhua tug yeej tseem cim tau
Tias peb thawj tug phoojywg nws zoo licas tiag
Qhov no tsuas yog ib vuag dhau cim rau nruab siab

Thov txhob xav licas rau tej kuv tej kev xav ntawm no
Vim kuv tsuas hais li ib txhia neeg tej neej dhau los
Txawm kuv hais raug koj lub neej mentsis
Los thov txhob khaws ua kev chim os mog.

Nyobzoo os cov phoojywg,

Tos hais tias ncaim cev tsis ncaim siab los vim twb tseg tsis taus nej kiag
Thiaj rov qab tuaj ncig saib puas pom nej tabsis nej twb mus nej lawm deb
Xav zoj los chim siab thiaj de me nplooj tshuam nej kev seb nej puas yuav teb
Los nim tsis hnov nej teb qhov twg tuaj ces ntshe kawg zaum no quaj